Meteorologët në Itali paralajmërojnë për një valë të gjashtë të nxehtit afrikan, sipas raportimeve të La Repubblica, ndërsa me hyrjen e shtatorit parashikohen edhe disa reshje dhe stuhira të izoluara, veçanërisht në zonat malore. Këto reshje priten të jenë një pauzë e shkurtër, pasi më pas mund të rikthehet përvëlimi. Ekspertët parashikojnë që temperaturat do të mbeten pak mbi mesataren sezonale dhe në disa qytete, përfshirë Romën, termometri mund të shënojë përsëri 36–37°C.
Media raporton se që nga e enjtja ka të ngjarë të formohet një kupolë nxehtësie, e njohur si “Heat Dome”, e cila mund të shtrihet mbi Itali dhe mbi zona të mëdha të Europës, duke përfshirë Gjermaninë, Zvicrën, Francën dhe Austrinë. Sipas parashikimeve, një anticiklon afrikan pritet të dominojë gjatë fundjavës, duke sjellë një anomali termike që do të ndihet edhe në veri të vendit. Në Milano, termometërat mund të arrijnë deri në 36°C, një vlerë që, nëse konfirmohet, do të ishte e jashtëzakonshme për muajin shtator dhe mund të thyente rekordin historik të temperaturave për këtë muaj.
Meteorologët shprehin shpresën se netët, të cilat janë bërë më të gjata me afrimin e vjeshtës, do të ndihmojnë në shpërndarjen graduale të kësaj nxehtësie të pazakontë dhe të sjellin lehtësim pas një vere të jashtëzakonshme. Fillimi zyrtar i vjeshtës pritet më 23 shtator, por ndikimi i anticiklonit afrikan dhe i kupolës së nxehtësisë mund të bëjë që kushtet termike të mbeten jashtëzakonisht të ngrohta edhe pas kësaj date. Për momentin, parashikimet theksojnë si rrezikun e valës së nxehtit ashtu edhe mundësinë e stuhi të izoluara, me ndikim më të qartë në zonat malore dhe pjesë të veriut të Italisë.
