Tregu i pasurive të paluajtshme në Shqipëri vazhdon të rritet, por me ritme më të ngadalta se më parë. Sipas indeksit Fischer të Bankës së Shqipërisë, çmimi mesatar i banesave në 6‑mujorin e dytë 2025 u rrit me 11.7% krahasuar me gjysmën e mëparshme dhe me 28% në bazë vjetore; në 6‑mujorin e parë rritja vjetore kishte qenë 41.7%. Ngadalësimi është më i dukshëm në Tiranë, ku çmimet nuk ndryshuan nga gjysma e mëparshme dhe u rritën vetëm 4.4% në bazë vjetore, kundrejt 32.6% në fillim të vitit. Banka e Shqipërisë vlerëson se kontributin kryesor në rritjen e indeksit e kanë dhënë zonat bregdetare.
Koha mesatare e shitjes së banesave u ul në rang vendi në 9.1 muaj nga 11.6 më parë, me rënie të fortë në Tiranë (8.1 muaj) dhe rritje të lehtë në bregdet (9.9 muaj). Financimi bankar mbetet i rëndësishëm: rreth 61% e shitjeve janë realizuar me kredi. Blerësit jorezidentë përbënin rreth 25% të banesave të shitura në 6‑mujorin e dytë të vitit, dhe gjysma e tyre janë shtetas të Bashkimit Europian.
Numri i kontratave të shitblerjes të regjistruara në Agjencinë e Regjistrimit të Pasurive të Paluajtshme (ASHK) arriti rreth 36 mijë gjatë 2025‑ës, në rritje me 14% krahasuar me vitin e kaluar (9% për Tiranën), megjithëse kjo shifër nuk pasqyron plotësisht tregun për shkak të kontratave të porosisë të pashënuara ende në kadastër. Ofertën e re e nxit edhe rritja rekord e të ardhurave nga taksa e ndikimit në infrastrukturë: 18.3 miliardë lekë në 6‑mujorin e parë 2026, tre herë më shumë se një vit më parë; rreth 68% e këtyre të ardhurave erdhën nga Bashkia Tiranë, ndërsa rritje të forta shënuan Himara, Saranda, Durrësi dhe Golemi.
Investimet e huaja në prona mbeten një motor i rëndësishëm: ato arritën vlerën rekord 561 milionë euro në 2025‑n, në rritje me 48%, duke përbërë mbi 34% të totalit të Investimeve të Huaja Direkte. Stoku total i investimeve të huaja në pasuri të paluajtshme u vlerësua në 2.63 miliardë euro në fund të vitit, me rritje 29% brenda vitit. Analistët e tregut vlerësojnë se rritja e mëtejshme e çmimeve me ritmet e deritanishme është e paktë për shkak të ofertës në rritje, tendencave demografike negative dhe shtrëngimit të pritshëm të kredisë bankare.
