Ministri për Evropën dhe Punët e Jashtme, Ferit Hoxha, reagoi pas deklaratave të kryeministrit të Malit të Zi, Milojko Spajiç, që akuzonin përfshirjen e pretenduar të zyrtarëve nga “të paktën dy vende të rajonit” në veprimtari të koordinuara hibride. Hoxha nënvizoi se ndaj Shqipërisë nuk ka asnjë akuzë zyrtare dhe mohoi kategorikisht çdo përfshirje të vendit në skenarë destabilizues në Malin e Zi apo kudo tjetër. Ai bëri thirrje për qetësi përpara se të shpërthejnë “zhurma” dhe “zjarre të panevojshme”, duke theksuar se raportimet mediatike janë pjesë e debatit publik, por duhet lexuar dhe analizuar me rezervë, sidomos kur përmbajnë interpretime të ndryshme apo kontradiktore.
Hoxha rikujtoi se Shqipëria nuk është dhe nuk mund të jetë pjesë e ndonjë skenari destabilizues ndaj Malit të Zi — një vend fqinj, mik, partner dhe aleat në NATO — dhe as në vende të tjera, duke vënë në dukje se dy vendet ndajnë po ashtu projektin e anëtarësimit në Bashkimin Evropian. Sipas tij, Shqipëria vepron në drejtim të kundërt: investon çdo ditë në bashkëpunimin, mirëkuptimin, stabilitetin dhe zhvillimin e rajonit, si dhe në bashkëpunimin më të gjerë evropian e euroatlantik.
Ai paralajmëroi që hamendësimet, interpretimet mediatike apo debatet e brendshme politike të një vendi fqinj nuk duhet të prodhojnë artificialisht probleme mes dy vendeve. Hoxha theksoi se MEPJ është në kontakt të vazhdueshëm me partnerët malazezë dhe se vetë ka komunikuar për këtë çështje me Zv.Kryeministrin dhe Ministrin e Punëve të Jashtme, Ibrahimović, si dhe me Zv.Kryeministrin Nik Gjeloshaj. Në këtë kontekst, ai ftoi aktorët e ndryshëm, përfshirë politikanët, të kërkojnë nga MEPJ çdo informacion të nevojshëm për të shmangur debate të panevojshme dhe, mbi të gjitha, për të mos lejuar që politika e jashtme e vendit të kthehet në objekt apo instrument të debateve dhe qasjeve partiake të brendshme.
Përfundimisht, Hoxha vuri theksin se politika e jashtme kërkon qetësi, maturi dhe përgjegjësi, duke i bërë thirrje të gjithë aktorëve të veprojnë në këtë frymë për të ruajtur marrëdhëniet dhe stabilitetin rajonal.
