Familja e një miliarderi brazilian përjetoi momente terrori në Saint-Tropez, pasi katër persona të armatosur hynë me forcë në vilën luksoze ku po kalonin pushimet dhe i kërcënuan e lidhën banorët. Ngjarja ndodhi në orët e para të 16 korrikut, rreth orës 03:30. Biznesmeni, pasuria e të cilit vlerësohet rreth 1.4 miliardë dollarë, kishte marrë me qira vilën për dy javë së bashku me gruan dhe dy djemtë.
Sipas mediave franceze, vila duket se ishte zgjedhur paraprakisht nga grabitësit. Katër autorët, të ardhur nga Marseja, mbërritën me një automjet të vjedhur dhe kishin me vete një pistoletë gjysmëautomatike, çekiç, lidhëse kabllosh, shirit ngjitës, sprej piperi dhe pajisje për bllokimin e sinjalit. Fillimisht neutralizuan rojen e sigurisë, të cilin e kërcënuan me armë, e detyruan të mbyllte qenin në automjet, e çuan drejt vilës dhe e spërkatën me sprej piperi.
Brenda rezidencës grabitësit kontrolluan dhomat. Njëri i drejtoi armën në kokë partneres australiane të njërit prej djemve dhe i kërkoi paratë. Dy të tjerë hynë në dhomën e miliarderit dhe gruas së tij, dhe nën kërcënimin e armëve kërkuan të dinin se ku ruheshin bizhuteritë dhe orët e shtrenjta. Banorët u mblodhën në një nga dhomat dhe u lidhën.
Nga ngjarja raportohet se një prej banorëve arratiset dhe njofton policinë. Në kaosin e krijuar, një grua e re arriti t’u shpëtonte grabitësve, mori telefonin dhe u fsheh në kopsht; pak para orës 05:00 ajo njoftoi policinë. Forcat e rendit mbërritën disa minuta më vonë dhe arrestuan tre prej të dyshuarve teksa përpiqeshin të largoheshin nga vila. I katërti u fsheh në çatinë e rezidencës por u gjet dhe u arrestua më vonë; bëhet fjalë për një 29-vjeçar që dyshohet se plagosi një efektiv policie gjatë arrestimit.
Katër të dyshuarit janë vënë nën hetim formal për grabitje të armatosur dhe ndalim të paligjshëm dhe janë lënë në paraburgim. Nga dëshmitë e tyre, hetuesit kanë krijuar dyshime se grabitja ishte planifikuar dhe se vila nuk ishte zgjedhur rastësisht.
