Mbi 300 persona janë arrestuar në Greqi që nga fillimi i vitit, të dyshuar si shkaktarë të zjarreve në pyje, përfshirë zjarrvënie të qëllimshme dhe nga pakujdesia. Sipas zëdhënësit të zjarrfikësve grekë, Giorgos Artopoios, 272 raste lidhen me zjarrvënie nga pakujdesia, ndërsa 36 raste dyshohet se janë shkaktuar me dashje.
Një rast i fundit u regjistrua në Kretë, ku një zjarr pranë një zone pyjore dyshohet të ketë nisur pasi një turist kishte ndezur një skarë me qymyr pranë pyllit. Turisti i deklaroi autoriteteve se nuk ishte i dijshëm për ndalimin e përdorimit të zjarrit në ambiente të hapura gjatë periudhave me erë të fortë dhe mot të thatë.
Autoritetet greke paralajmërojnë për rritje të rrezikut nga zjarret për shkak të thatësirës, erërave të forta dhe temperaturave ekstreme. Në ditët në vijim, në pjesën më të madhe të vendit priten temperatura mbi 40 gradë Celsius, ndërsa vala e të nxehtit pritet të zgjasë deri në mesin e javës së ardhshme. Kushtet atmosferike të vështira favorizojnë përhapjen e shpejtë të flakëve, duke rritur gatishmërinë e shërbimeve të emergjencës.
Për të parandaluar dëmet në zonat me rëndësi kulturore, Greqia ka nisur instalimin e një sistemi modern monitorimi dhe alarmi për zbulimin e hershëm të zjarreve. Sistemi u testua me sukses pranë Akropolit të Mikenës, në gadishullin e Peloponezit, dhe është planifikuar të vendoset në 22 qendra historike në gjithë vendin. Pajisjet përfshijnë kamera optike dhe termike, disa me pamje panoramike 360 gradë, të cilat mund të monitorojnë zona të mëdha dhe të identifikojnë shenja të hershme të zjarrit.
Deri në fund të gushtit pritet të aktivizohen gjashtë sisteme të reja, ndërsa tetë sisteme të tjera do të instalohen gjatë muajit shtator. Autoritetet vazhdojnë të përforcojnë masat dhe monitorimin për të reduktuar rrezikun dhe për të mbrojtur zonat pyjore dhe monumentet historike.
