Dy punonjës policie janë pezulluar nga detyra pas vrasjes së 20-vjeçarit portugez Luis Miguel Varela Mendes në Ksamil. Bëhet fjalë për Miosid Matushaj, punonjës të strukturave të Policisë së Kufirit dhe Migracionit në Gjirokastër, dhe Romeo Shehu, punonjës të Policisë Bashkiake Gjirokastër. Sipas hetimeve, të dy ndodheshin në lokalin “Principote” në momentin kur nisi konflikti që më pas përfundoi me vrasjen e turistit.
Të dy punonjësit kishin shkuar në lokal në rolin e bodyguard-ëve dhe, si pjesë e detyrës së tyre, duhej të garantonin sigurinë në ambientet e lokalit. Sipas Policisë, gjatë konfliktit ata nuk kanë ndërhyrë për të parandaluar përshkallëzimin e situatës, ndërsa pas ngjarjes nuk kanë njoftuar autoritetet e Policisë së Shtetit për vrasjen. Për këto pamundësi dhe mosveprime, ndaj tyre është marrë masa e pezullimit nga detyra.
Miosid Matushaj është arrestuar dhe ndaj tij rëndojnë akuzat për “moskallëzim të krimit” dhe “mosmarrje të masave për të ndërprerë gjendjen e paligjshmërisë”. Për Romeo Shehun hetimet lidhen me përgjegjësinë për moskallëzimin e ngjarjes. Nga dosja hetimore rezulton gjithashtu se në momentin e konfliktit në “Principote” ndodheshin edhe dy persona të tjerë që ushtronin funksione sigurie, ndër të cilët mund të përfshihen anëtarë të stafit të lokalit ose persona të tjerë të angazhuar si sigurim.
Policia ka referuar në Prokurori përgjegjësitë e të gjithë atyre që ishin të pranishëm për veprimet dhe mosveprimet e kryera para dhe pas vrasjes. Hetimet kanë synim të përcaktojnë rolin e secilit individ të përfshirë në sigurinë e ambientit dhe të sqarojnë nëse është shkelur detyra zyrtare apo ka patur shkelje të tjera ligjore gjatë ngjarjes. Procesi hetimor vazhdon, ndërsa masat disiplinore dhe penale ndaj punonjësve të përfshirë janë në përputhje me gjetjet e hetimeve dhe referimin në Prokurori.
