Kombëtarja shqiptare U-21 do të marrë pjesë në Lojërat Mesdhetare “Taranto 2026”, me trajnerin Alban Bushi që ka publikuar listën e lojtarëve që do të përfaqësojnë Shqipërinë. Pas shpalljes së emrave, Bushi u shpreh për fshf.org mbi pritshmëritë, objektivat dhe rëndësinë e këtij turneu për një grup të ri futbollistësh kuqezi.
Trajneri e përshkroi pjesëmarrjen jo thjesht si një turne, por si një mundësi për të treguar karakterin, personalitetin dhe mentalitetin e futbollit shqiptar. Ai vlerësoi se grupi i konkurrencës është i fortë, duke përmendur Italinë, Kosovën dhe Algjerinë, por nënvizoi se Shqipëria shkon për t’u konkurruar me to, jo vetëm për të qenë pjesëmarrëse. Objektivi kryesor është kualifikimi, edhe pse Bushi e pranon vështirësinë e këtij qëllimi. Sipas tij, futbolli fiton me organizim, besim dhe luftë për çdo top, jo vetëm me emra dhe histori.
Lista e publikuar është pothuajse krejtësisht e re, me lojtarë të lindur kryesisht në vitet 2006, 2007 dhe 2008, që sezonin e ardhshëm do të jenë pjesë e ekipit U-21. Bushi theksoi se për këta të rinj ky turne përbën një mundësi për të treguar vlerat e tyre dhe për t’u matur me futbollin europian. Ai njohu gjithashtu se disa lojtarë nuk janë në gjendje optimale për shkak se kampionati i Kategorisë së Parë ende nuk ka nisur, por shprehu besimin se loja e ekipit do të jetë e mirë.
Trajneri vuri në dukje sfidën e parë ndaj Italisë dhe kohën e shkurtër për përgatitje. Stafi teknik do t’u përcjellë futbollistëve idetë dhe strategjitë e nevojshme për ndeshjen e hapjes, të planifikuar të luhet të shtunën në orën 21:00. Bushi theksoi se për ekipin çdo ndeshje do të trajtohet si një finale, duke kërkuar një performancë dinjitoze dhe duke shprehur dëshirën për të synuar fitimin e turneut. Top Channel.
