Ngushtica e Hormuzit është kthyer në një pikë kyçe të përballjes mes Iranit dhe Shteteve të Bashkuara, ndërsa të dhënat tregojnë se Teherani po humbet një pjesë të kontrollit mbi këtë korridor kryesor për transportin botëror të naftës. Sipas Kpler, mbi 80% e anijeve që kaluan nëpër ngushticë gjatë dy javëve të fundit përdorën rrugën detare pranë Omanit, një kanal i autorizuar nga OKB-ja që Irani e kundërshton fuqishëm. Teherani e konsideron ngushticën nën kontrollin e vet dhe ka sulmuar dhjetëra anije, por shumica e anijeve po injorojnë kërkesat iraniane dhe vazhdojnë lundrimin, duke u mbështetur te mbrojtja e forcave detare amerikane.
Homayoun Falakshahi, drejtues i analizës së naftës bruto në Kpler, vlerësoi se Irani duket të ketë humbur të paktën pjesërisht kontrollin e ngushticës. Situata ka ndryshuar dukshëm krahasuar me një muaj më parë, kur pothuajse nuk kishte trafik përmes rrugës së Omanit. Kjo zhvendosje ka kufizuar edhe mundësinë e Teheranit për të vendosur tarifa mbi anijet që kalojnë, siç kishte bërë në pranverë. Edhe pse skadimi i Memorandumit të Mirëkuptimit mes SHBA-së dhe Iranit teorikisht i hap rrugë vendosjes së tarifave, ekspertët nuk shohin shenja se Irani po i mbledh ato në praktikë.
Kuvajti, Arabia Saudite dhe Emiratet e Bashkuara Arabe kanë marrë me qira supercisternat për të transportuar naftë nga Gjiri Persik përmes ngushticës, dhe më pas transferojnë ngarkesën te cisterna të tjera jashtë zonës së rrezikut, në Gjirin e Omanit. Disa anije çaktivizojnë transponderët dhe zhduken nga sistemet tradicionale të gjurmimit për javë, një praktikë e quajtur “trafik i errët” që mund të mos kapet plotësisht nga disa sisteme monitorimi. SHBA-ja pretendon se, me praninë e saj ushtarake, ka një pamje më të plotë të lëvizjes së anijeve.
Sekretari amerikan i Energjisë, Chris Wright, tha se sasia e naftës që kaloi përmes ngushticës dhe u ridrejtuar arriti rreth 15 milionë fuçi në ditë gjatë një jave, pranë mesatares prej rreth 20 milionë para luftës. Presidenti Donald Trump deklaroi se SHBA-ja ka “kontroll total” mbi ngushticën, por ekspertët e vënë këtë në dyshim, duke theksuar se Irani vazhdon sulmet dhe flukset e naftës mbeten më të ulëta. Sipas Andy Lipoë, duket se Irani ka humbur pjesërisht kontrollin, dhe ekspertët vlerësojnë se qëllimi kryesor i Teheranit mund të jetë frenimi dhe kërcënimi i trafikut detar, jo kontrolli absolut i ngushticës.
