Shërbimet e Komisariatit të Policisë Mirditë finalizuan operacionin policor të koduar “Piromani” pas marrjes së informacionit në rrugë operative dhe ndjekjes në terren për tre ditë. Si rezultat u kap dhe arrestua në flagrancë shtetasi P. M., 65 vjeç, banues në fshatin Gziq, Njësia Administrative Rrëshen, Bashkia Mirditë, për veprat penale “Shkatërrimi i pronës me zjarr” dhe “Shkatërrimi me zjarr i pyjeve dhe i mjedisit pyjor”.
Në momentin e kapjes, sipas njoftimit, ai sapo kishte ndezur tre vatra zjarri në fshatin Gziq, të cilat përfshinë një sipërfaqe pyjore. Vatrat e zjarrit u vunë menjëherë nën kontroll nga shërbimet zjarrfikëse, në bashkëpunim me shërbimet e Komisariatit të Policisë Mirditë.
Nga veprimet hetimore dyshohet se i arrestuari është autor i disa zjarrvënieve të tjera të ndodhura në territorin e Bashkisë Mirditë. Specialistët e Hetimit të Krimit të Komisariatit, nën drejtimin e Prokurorisë, vijojnë punën për dokumentimin e plotë të rasteve të tjera të zjarrvënieve, për të cilat ky shtetas dyshohet si autor.
Materialet procedurale do t’i kalojnë Prokurorisë për veprime të mëtejshme. Top Channel.
