Policia e Tiranës ka arrestuar njërin prej autorëve të dyshuar të një grabitjeje me armë zjarri në një argjendari në Paskuqan rreth dy javë më parë. Sipas raportimit të gazetaren Dorjana Bezat, në pranga ka rënë Argys Kalsi, i kapur në Qafë Thanë ndërsa po tentonte të largohej nga vendi. Autori i dyshuar është identifikuar nga arma dhe rrobat që policia i gjeti pak ditë pas ngjarjes. Dyshohet se në grabitje morën pjesë dy persona të maskuar, ndërsa vlera e bizhuterive të vjedhura dyshohet të jetë rreth 1.5 milionë lekë të reja.
Në lidhje me të njëjtin rast, vijojnë hetimet intensive për vjedhjen e bizhuterive në një argjendari në Kamëz më datë 05.08.2026. Specialistët për Hetimin e Krimeve të Komisariatit të Policisë Nr. 5, pas disa javësh pune hetimore e proaktive dhe në bashkëpunim me Prokurorinë e Tiranës, finalizuan operacionin e koduar “Gold”, duke bërë të mundur identifikimin, kapjen dhe arrestimin e shtetasit A. K., 35 vjeç, banues në Laç.
Nga hetimet rezulton se ky shtetas, së bashku me një bashkëpunëtor ende të paidentifikuar, më datë 05.08.2026 kanë vjedhur një sasi bizhuterish dhe janë larguar me një motomjet. Gjatë periudhës së hetimit janë sekuestruar si prova materiale një armë zjarri automatike, një krehër me fishekë, një skafandër motoçiklete e lyer me ngjyrë gri, dy maska silikoni, një palë doreza, si dhe veshje të tjera që dyshohet se janë përdorur gjatë kryerjes së veprës penale. Këto sende u gjetën dhe u sekuestruan më datë 06.08.2026 në një zonë të pyllëzuar të fshatit Zgafnur. Më datë 09.08.2026, në vendin e quajtur “Liqeni i Qinamit”, fshati Qinam, u gjet dhe u sekuestrua një motomjet që dyshohet se është përdorur gjatë kryerjes së vjedhjes.
Vijon puna për identifikimin dhe kapjen e bashkëpunëtorit tjetër, si dhe për dokumentimin e plotë të rastit. Materialet procedurale i janë kaluar Prokurorisë për veprat penale “Vjedhja me dhunë e kryer në bashkëpunim” dhe “Mbajtja pa leje dhe prodhimi i armëve shpërthyese dhe i municionit”. Top Channel
