Numri i viktimave nga ethet e Nilit Perëndimor në Maqedoninë e Veriut është rritur në tre. Viktima e fundit është një 61-vjeçar. Në vend janë konfirmuar 35 raste të infektimit, gjashtë prej të cilëve në gjendje kritike.
Ministri i Shëndetësisë, Sasho Klekovski, njoftoi se ka nisur spërkatja kundër mushkonjave në disa zona, ndërsa të tjera do t’i nënshtrohen këtij procesi në ditët në vijim. Në Shkup është planifikuar spërkatje nga ajri në 17 mijë hektarë dhe me spërkatje tokësore në 5 mijë hektarë. Ai tha se janë parashikuar edhe ndërhyrje në ujërat e ndenjura, përfshirë pellgjet në park dhe liqenin në Stajkovcë.
Drejtori i Klinikës për Sëmundje Infektive, Fadil Cana, bëri të ditur se gjashtë pacientë po trajtohen në Njësinë e Kujdesit Intensiv, ndërsa 16 të tjerë janë të shtruar në Klinikë. Cana theksoi se pacienti më i ri është 25 vjeç dhe ndodhet në gjendje të qëndrueshme.
Ethet e Nilit Perëndimor transmetohen përmes pickimit të mushkonjave të infektuara. Sipas njoftimeve, rreziku për forma të rënda të sëmundjes është më i lartë te të moshuarit, personat me imunitet të dobët dhe ata që vuajnë nga sëmundje kronike.
Ndërkohë, Athina vazhdon të jetë një nga zonat më të prekura në Evropë nga ethet e Nilit Perëndimor. Në Greqi janë regjistruar deri tani 81 raste dhe nëntë viktima.
Autoritetet shëndetësore në Maqedoninë e Veriut kanë nisur masa të drejtpërdrejta për kontrollin e mushkonjave dhe evidentimin e rasteve, përfshirë spërkatjet masive dhe intervenimet në burimet e ujit të ndenjur, ndërsa klinikat trajtojnë pacientët e prekur dhe monitorojnë gjendjen e atyre në kujdes intensiv.
