Presidenti amerikan Donald Trump e prezantoi si sukses të administratës së tij rënien historike të çmimeve të barnave me recetë, dukembajtur një kopje të Washington Post dhe duke i kërkuar gazetarëve të shikonin titullin. “Titulli kryesor i sotëm është pikërisht ky. A e patë?”, tha ai, ndërsa lexoi pjesën e parë të artikullit dhe shtoi: “Në rregull, e kuptuat? A e kuptuan të gjithë? Ju thashë se kjo do të ndodhte”. Ai gjithashtu u bëri thirrje gazetarëve që ta përhapnin lajmin. Shtëpia e Bardhë publikoi fotografinë e presidentit me faqen e gazetës dhe shpërndau lajmin në rrjetet sociale.
Megjithatë, vetë artikulli i Washington Post arrin në përfundim ndryshe: një pjesë e rëndësishme e uljes së çmimeve lidhet me masa të miratuara gjatë presidencës së Joe Biden. Bëhet fjalë për Aktin e Reduktimit të Inflacionit të miratuar në vitin 2022, i cili i dha programit Medicare mundësinë të negociojë drejtpërdrejt me kompanitë farmaceutike për çmimet e disa barnave me recetë. Uljet e para të çmimeve të rezultuara nga këto negociata hynë në fuqi në fillim të vitit 2026.
Sipas të dhënave të Indeksit të Çmimeve të Konsumatorit të publikuara nga Byroja e Statistikave të Punës (BLS), çmimet e barnave me recetë ranë me 3.1% në korrik, duke shënuar rënien vjetore më të madhe në më shumë se gjashtë dekada. Të dhënat e BLS u shfaqën pavarësisht se kreun e kësaj agjencie Trump e shkarkoi një vit më parë, pas publikimit të të dhënave më të dobëta se sa pritej për tregun e punës, të cilat presidenti i kishte quajtur “të rreme”.
Ekspertët e politikave shëndetësore janë skeptikë ndaj pretendimit se rënia e çmimeve është kryesisht rezultat i politikave të administratës Trump. Richard Frank nga Universiteti i Harvardit tha se, nëse do të duhej të zgjidhte faktorët më me ndikim, do të zgjidhte ndërhyrjet e Aktit të Reduktimit të Inflacionit. Në të njëjtën linjë u shpreh edhe Stacy Dusetzina nga Universiteti Vanderbilt, e cila theksoi se ligji i Biden është shpjegimi më i mundshëm për rënien. Deri tani, negociatat përfshijnë vetëm 10 barna, por ato janë përdorur gjerësisht dhe mund të ndikojnë ndjeshëm në indeksin e përgjithshëm të barnave me recetë.
Pavarësisht përmbajtjes së artikullit, zyrtarë të Shtëpisë së Bardhë vijuan ta atribuonin rënien politikave të Trump; drejtori i komunikimit shkroi në rrjetin X: “Gjithçka falë Presidentit Trump!”
