I nxehti shkatërrimtar i kësaj vere është vetëm fillimi i asaj çfarë na pret në të ardhmen, paralajmëron një organizatë e pavarur shkencëtarësh britanikë. Në Londër temperaturat vijojnë të luhaten rreth 37 gradë, ndërsa regjistrohen vonesa dhe anulime të trenave për shkak të zgjerimit termik të shinave.
Më e rëndë situata paraqitet në qarkun jugor të Hampshire-it, ku temperaturat shumë të larta dhe ulja e reshjeve kanë shtuar thatësirën. Por edhe pjesa tjetër e Evropës është në gjendje kritike: nga Spanja deri në Ballkan, në shumë zona është shpallur emergjencë për ujin.
Thatësira po shkakton pasoja të mëdha në lumenjtë e mëdhenj evropianë. Danubi ka arritur nivele jashtëzakonisht të ulëta, duke ndikuar në lundrimin dhe prodhimin e energjisë. Në Rumani, mungesa e ujit ka çuar në mbylljen e një reaktori të centralit bërthamor të Cernavodës, ndërsa në Hungari, centrali bërthamor i Paksit është detyruar të ulë ndjeshëm prodhimin.
Edhe në Kaub, në Gjermani, lumi Ren ka arritur nivelin më të ulët që nga fillimi i matjeve, në vitin 1880. Kjo po detyron disa gjigantë të industrisë kimike të ndryshojnë mënyrën e transportit, duke përdorur hekurudhën dhe rrugën tokësore, me kosto të larta logjistike: për të zëvendësuar vetëm një anije transporti lumor duhen deri në 60 kamionë.
Në Shtetet e Bashkuara, pasojat e korrikut më të nxehtë të regjistruar ndonjëherë gjatë 132 viteve të matjeve të National Oceanic and Atmospheric Administration (NOAA) po vihen re në lumin Colorado, nga i cili varen rreth 40 milionë njerëz në shtatë shtete. Lumi furnizon dy rezervuarët artificialë më të mëdhenj të SHBA-së, Lake Mead dhe Lake Powell, të cilët kanë arritur përkatësisht në vetëm 27% dhe 22,7% të kapacitetit të tyre, nivele këto rekord të ulëta.
