Prej disa ditësh pensionistët në Durrës paraqiten në zyrat e Postës pa mundur të marrin pensionin në datën e caktuar e as në ditët në vazhdim. Ata presin në radhë nën temperatura të larta dhe, sipas tyre, pasi mbërrijnë te sporteli dëgjojnë të njëjtën përgjigje: nuk ka para. Sipas pensionistëve, kjo situatë përsëritet pothuajse çdo muaj dhe i detyron të bëjnë ecejake për të marrë pagat nga të cilat varen ilaçet, ushqimet dhe shpenzimet e përditshme.
Shkaku i vonesave, sipas raportimeve, është mungesa e fondeve, pasi shpërndarja e pensioneve varet nga fondet që sjell filiali i Postës së Durrësit dhe shpesh edhe nga arkëtimet e tjera. Kjo varësi ka sjellë që pensionistët të mbeten pa para në ditët e pritshme të pagesës, me pasoja direkte për jetesën e tyre.
Skepticizmi dhe shqetësimi i pensionistëve vjen ndërkohë që Posta Shqiptare është përballur me një tjetër problem në filialin e Durrësit. Muajin e kaluar u denoncua mungesa e një fondi me vlerë rreth 700 mijë euro. Për këtë rast janë arrestuar drejtuesja e filialit, shefja e financës dhe arkëtarja. Të trija personat akuzohen për vjedhje përmes shpërdorimit të detyrës. Hetimet, sipas njoftimeve, po përpiqen të gjejnë gjurmët për rikthimin e parave që mungojnë.
Ndërsa organet hetimore kërkojnë prova dhe gjurmë për të zbuluar vendndodhjen e fondeve të humbura, pensionistët kërkojnë vetëm një gjë konkrete: të ndalet sorollatja dhe të u paguhen pensionet në kohë. Situata paraqitet si një problem ditor për të përfshirët, me pritje të gjata dhe shqetësime për nivelin e jetesës, ndërsa hetimet mbi fondin e humbur vazhdojnë.
