Ish-deputeti Pandeli Majko reagoi pas deklaratës së presidentit ukrainas Volodymyr Zelensky në Beograd për Kosovën, duke risjellë marrëdhëniet mes shqiptarëve dhe ukrainasve dhe një fotografi nga parlamenti i Ukrainës. Majko publikoi një foto që, sipas tij, është realizuar në përvjetorin e agresionit rus në parlamentin e Ukrainës dhe kishte për qëllim të tregonte pritjen që iu bë flamurit shqiptar nga të pranishmit. “Kjo është një foto në parlamentin e Ukrainës në përvjetorin e agresionit rus! Ajo është një foto e realizuar nga salla, për të treguar kënaqësinë me të cilën u prit flamuri shqiptar nga të pranishmit!”, shkroi Majko. Ai tha se atë ditë nuk kishte shumë delegacione të huaja, sepse kishte informacione se godina e parlamentit në Kiev mund të goditej.
Duke komentuar qëndrimin e Zelenskyt në Beograd, Majko e cilësoi atë “konservativ”, por u shpreh i bindur se kjo nuk e ndryshon perceptimin e ukrainasve për shqiptarët: “Pavarësisht deklarimit ‘konservativ’ të Presidentit Zelenski në Beograd, në vizitën e tij të fundit, jam i bindur se ukrainasit i kanë parë dhe i shohin shqiptarët si aleatët e tyre!”. Ai theksoi se marrëdhëniet mes dy popujve nuk përcaktohen vetëm nga diplomacia zyrtare: “Miqësia dhe aleanca e shqiptarëve me ukrainasit nuk përcaktohet nga ‘protokollet e diplomacisë’!”.
Majko lidhi miqësinë edhe me historinë e diasporës shqiptare në Ukrainë, duke përmendur dëshmorët që kanë rënë në mbrojtje të vendit dhe vullnetarët shqiptarë që luftojnë pranë ushtrisë ukrainase: “Kjo miqësi ndërlidhet me diasporën e vjetër shqiptare e cila ka pasur dëshmorët e vet për mbrojtjen e Ukrainës! Ajo vazhdon, sot, me vullnetarët shqiptarë me uniformë në krah të ushtrisë ukrainase!”. Ai bëri dallimin mes diplomacisë dhe marrëdhënieve të krijuara në kohë lufte: “Lufta, për shqiptarët, i ndan miqtë nga armiqtë!” dhe shtoi se diplomacia është quajtur “arti i gënjeshtrës” për arsye shtetërore. Në përfundim, Majko deklaroi se ka komunikuar me miqtë e tij ukrainas, të shqetësuar për zhvillimet e fundit, dhe citoi shprehjen: “Jemi miq lufte, jo prostituta paqeje.”
