Tre persona u arrestuan në aksin rrugor Librazhd–Elbasan, pasi u kapën duke transportuar 24 emigrantë që kishin hyrë ilegalisht në Shqipëri. Të arrestuarit janë Florjan Mustafa, 22 vjeç, banues në Elbasan; Aleksandër Rira, 23 vjeç, banues në Përrenjas; dhe Denis Çollaku, 24 vjeç, po ashtu banues në Përrenjas. Ngjarjet ndodhën gjatë dy ndërhyrjeve të njëpasnjëshme policore, të koduara “Aksi” dhe “Aksi 01”.
Gjatë operacionit “Aksi” u arrestua në flagrancë Florjan Mustafa duke transportuar 14 emigrantë. Në operacionin “Aksi 01” u arrestuan në flagrancë Aleksandër Rira dhe Denis Çollaku, të cilët po transportonin 10 emigrantë. Nga veprimet verifikuese rezultoi se Aleksandër Rira e drejtonte automjetin pa leje drejtimi. Për rastet u sekuestruan dy automjete.
Operacionet u finalizuan si rezultat i administrimit të shpejtë të informacioneve të siguruara në rrugë operative. Në këto veprime morën pjesë specialistët e Seksionit për Hetimin e Trafiqeve në bashkëpunim me shërbimet e Forcës së Posaçme Operacionale dhe Forcës së Posaçme “Shqiponja”. Sipas njoftimit, personat e përfshirë ishin të angazhuar në veprimtarinë kriminale të transportimit kundrejt pagesave të emigrantëve nga Vendet e Treta, të cilët synonin të shkonin në mënyrë të paligjshme në shtetet e Bashkimit Evropian.
Materialet procedurale lidhur me këto ngjarje iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme. Në njoftim përmendet se nga veprimet e kryera u siguruan prova dhe informacione operative që mundësuan ndërhyrjet dhe prangosjet në flagrancë.
