Pas deklaratave të Presidentit Trump se bisedimet e reja me Iranin do të fillojnë të hënën dhe se ai anuloi aksione që i quajti sulme masive ndaj vendit, çmimet e karburanteve në tregjet ndërkombëtare nisën të bien lehtë. Investitorët reaguan pozitivisht ndaj sinjaleve për një marrëveshje mes Shteteve të Bashkuara dhe Iranit, me pritshmëri për ulje të tensioneve në Lindjen e Mesme dhe për rihapje të plotë të Ngushticës së Hormuzit, çka rriti besimin se furnizimi global me naftë mund të normalizohet.
Nafta Brent zbriti nën 78 dollarë për fuçi, ndërsa nafta amerikane WTI u tregtua rreth 79 dollarë për fuçi. Analistët thonë se tregjet po parashikojnë rikthimin e eksporteve iraniane dhe një ofertë më të lartë në tregun ndërkombëtar, faktorë që ushtrojnë presion për uljen e çmimeve. Megjithatë, ata paralajmërojnë se paqëndrueshmëria nuk ka marrë fund: mungesa e detajeve mbi zbatimin e ndonjë marrëveshjeje dhe dinamika në Ngushticën e Hormuzit mund të vazhdojnë të shkaktojnë luhatje në ditët në vijim.
Për Shqipërinë, një ulje e qëndrueshme e çmimit të naftës në tregjet ndërkombëtare mund të krijojë hapësira për rënie të kostove të importit të karburanteve. Sidoqoftë, ndikimi në çmimet në pikat e shitjes brenda vendit nuk është i menjëhershëm, pasi varet nga stoqet ekzistuese, kostot e transportit dhe mënyra e furnizimit të kompanive importuese.
Në tregun vendas, nafta po tregtohet këto ditë për 214 lekë për litër, ndërsa benzina për 199 lekë për litër. Në këtë situatë, Konfindustria kërkon ndërhyrje të qeverisë në katër drejtime: uljen me 15% të taksave mbi karburantet, ringritjen e bordit të transparencës, ndërhyrje në kontrollin e cilësisë dhe masa për të luftuar naftën e kontrabanduar.
