Një zjarr ka rënë sot në dy banesa në lagjen “Çlirim” në qytetin e Beratit. Flakët nisën nga bahçet e dy shtëpive të pabanuara dhe u përhapën me shpejtësi, të favorizuara nga temperaturat e larta dhe era e ngrohtë. Banorët njoftuan zjarrfikësit, të cilët mbërritën në vendngjarje me tri mjete, ndërsa në ndihmë të tyre u angazhuan edhe forca të shumta policie.
Zjarri u përhap deri te çatia e një shtëpie që është monument kulture, por ndërhyrja në kohë e zjarrfikësve lokalizoi shpejt flakët dhe bëri të mundur shuarjen e zjarrit. Forcat zjarrfikëse qëndrojnë ende në zonë për të monitoruar vatrat dhe për të shmangur riaktivizimin e zjarrit.
Pranë vendit të ngjarjes ishte parkosur një mjet tip Ford, i cili pësuar dëmtime në pjesën e përparme, por u lëviz nga vendi për të shmangur rreziqe shtesë. Sipas burimeve të zjarrfikësve në vendngjarje, zjarri dyshohet të ketë qenë i qëllimshëm.
Ngjarja u raportua nga korrespondenti i Top Channel, Bledar Korreshi.
