Me bekimin e Papa Leonit XIV, Kardinali Ernest Simoni kremtoi Meshën e Shenjtë në ish-burgun e Spaçit, vend simbol të vuajtjes, martirizimit dhe qëndresës ndaj diktaturës komuniste. Kardinali u kthye në vendin ku pati vuajtur 18 vite heqje lirie, pas arrestimit në 1963 gjatë një mise që kishte drejtuar për vdekjen e Presidentit amerikan John Kenedy. Gjatë ceremonisë ai u lut për të dënuarit që kanë humbur jetën në kampet e burgut dhe përcolli mesazhe për falje, paqe dhe shpresë, duke theksuar se urrejtja nuk duhet të gjejë vend në zemrat e njerëzve.
Kardinali citoi përvojën e tij nga arrestimi: “Në 1963, u vra Presidenti John Kenedy. Papa dha urdhër të mbahej meshë në të gjithë botën … katër njerëz më vunë hekurat dhe më dënuar me varje në litar. Arsyeja? Sepse kisha thënë jemi të gjithë bijtë e Zotit, Krishti është babai i njerëzimit. Jemi bijtë e të madhit, të duam njëri-tjetrin, të duam atdheun dhe të mbrojmë të vërtetën”, duke u prezantuar edhe me titullin “Princ botëror i Krishtërimit”.
Në një letër drejtuar pjesëmarrësve, Papa Leoni XIV i dha bekimin apostolik pjesëmarrësve dhe u lut për ata që vuajtën në Spaç. Në mesazhin e tij, Papa përmendi se Spaçi ka qenë vend ku shumë janë përballur me padrejtësi dhe se gjaku i atyre që kanë vuajtur dhe vdekur ka “ujitur atë tokë”. Ai theksoi nevojën që kujtesa e tyre të mbetet e gjallë dhe të shërbejë për brezat e rinj si thirrje për dinjitetin e personit, vlerën e lirisë dhe angazhimin për paqe.
Ceremonisë iu bashkuan Kryegjyshi Botëror, Shenjtëria e Tij Haxhi Dede Baba Edmond Brahimaj, politikani Tom Doshi, zyrtarë, besimtarë dhe qytetarë të shumtë. Disa ish-të dënuar rrëfyen se Kardinali ka shpëtuar dhjetëra të rinj nga vetëvrasja në këto godina, dhe ai u vlerësua si nderi dhe krenaria e të përndjekurve politikë për qëndresën e tij të jashtëzakonshme. Ceremonia solli një atmosferë të ndryshme në mjediset e ngushta dhe të mbytura të godinave midis maleve.
