Me 5 gusht rikthehen ndeshjet e Champions League për femra, kur Vllaznia e Shkodrës do të luajë gjysmëfinalen e parë të grupit në turin e dytë të UEFA Women’s Champions League. Kampionia e Shqipërisë do të përballet me kampionen e Sllovakisë, Spartak Myjava, skuadër që Vllaznia e ka eliminuar edhe në edicione të kaluara të këtij kompeticioni.
Klubi shkodran ka prezantuar disa nga blerjet e reja në merkato, mes tyre edhe portierjen e Kombëtares shqiptare. Një nga futbollistet e prezantuara, Kendyl Sarver, shprehu emocionin e saj pas ftesës për të luajtur me Vllazninë dhe ambicien për të bërë gara të mëdha në Champions League: “Ishte emocionuese kur mora ftesën për të luajtur për Vllazninë, sidomos në Champions League, kompeticionin më të madh. Është një mundësi fantastike dhe duhet të besosh te vetja. Këto ndeshje janë për t’u fituar dhe për të shkruar historinë, prandaj besoj se do të kualifikohemi”, tha Kendyl Sarver.
Sukseset europiane të Vllaznisë kanë dëmtuar rivalët tradicionalë në renditjen e koeficienteve, duke rritur pozicionin e Shqipërisë dhe duke lënë pas vende si Turqia, Greqia dhe Kroacia. Si pasojë e përmirësimit të koeficientit, këtë sezon Shqipëria do të përfaqësohet për herë të parë me dy ekipe në UEFA Women’s Champions League. Përveç Vllaznisë, edhe Apolonia e Fierit do të marrë pjesë dhe do të përballet me skuadrën suedeze Hammarby.
Përgatitjet e Vllaznisë dhe afrimet e reja vijnë në vijim të aspiratave të klubit për të bërë rrugëtim të gjatë në kompeticion dhe për të shfrytëzuar shansin historik të përfaqësimit të dy klubeve shqiptare në garat europiane femërore këtë sezon. Top Channel.
