Tregu i akomodimit përmes qirave afatshkurtra në Shqipëri është zgjeruar në numër dhe vlerë, me çmime nate që luhaten nga 80 deri në 200 euro. Shtimi i turistëve këtë sezon veror ka rritur kërkesën, duke rritur ofertën dhe çmimet mbi 15% krahasuar me një vit më parë. Si shenjë e këtij trendi, në hyrjet e pallateve është shtuar prania e kutive të çelësave me kode për klientët që zgjedhin qira afatshkurtra; shembulli pranë qendrës së kryeqytetit tregon se nga 28 apartamente, 10 janë përshtatur për këtë treg.
Eksperti i investimeve Dorian Sanxhaku shprehu se shumë apartamente të mëparshme të disponueshme për qira afatgjata janë kthyer në oferta për qira afatshkurtra (Airbnb), duke sjellë të ardhura për pronarët, por duke vështirësuar situatën për familjet. Sipas tij, norma e zënies deri në fillim të korrikut varionte: Tirana 64%, Durrësi 54%, Vlora rreth 60% dhe Saranda 41%.
Sanxhaku gjithashtu raportoi nivelin e çmimeve në qytete të ndryshme: “Të huajt nisen nga revie-t në momentin që i gjejnë në Tiranë, çmimet i ke nga 100-150 euro, por mesatarja 80 euro, Durrësi 90 euro, Vlora 100 euro, Saranda 120 euro”. Sa i përket origjinës së turistëve, ai tha se interesi këtë sezon ishte i lartë, kryesisht nga francezët dhe amerikanët, dhe shtoi: “Dominante ngelen Vlora, Durrësi me çekët, kroatët, Saranda skandinavët, interesante dhe numri i amerikanëve që frekuentojnë Shqipërinë”.
Të dhënat e platformës AirDNA për vitin 2025 tregojnë një rritje rekord të tregut: familjet shqiptare fituan rreth 134 milionë euro dhe u regjistruan rreth 26.3 mijë apartamente dhe njësi akomodimi. Sipas raportimit, ndikimi i sektorit në të ardhurat fiskale do të ishte më i madh nëse tregu do të formalizohej plotësisht.
