Ka ndërruar jetë në mënyrë tragjike Artan Pogoni, ish-kampion si lojtar dhe trajner volejbolli, i angazhuar prej vitesh edhe në politikë. Pogoni u nda nga jeta pak orë më parë në Vlorë si pasojë e një infarkti, duke lënë pas një karrierë të gjatë në auditorë universitarë, fusha sportive dhe institucione drejtuese.
Prof. Asoc. Dr. Artan Pogoni njihej si një nga emrat e njohur të edukimit fizik, sportit dhe administrimit sportiv në vend. Ai mbante detyrën e Shefit të Departamentit të Edukimit Fizik dhe Sportit në Fakultetin e Shkencave Sociale, Turizmit dhe Sportit të Universitetit “Barleti” dhe ishte anëtar i Senatit Akademik të këtij institucioni. Me një formim të gjerë akademik, Doktor Shkencash dhe me katër diploma universiteti, ia kushtoi jetën zhvillimit të shkencave të sportit, sidomos në fushat e rekreacionit sportiv, metodologjisë së stërvitjes dhe edukimit fizik.
Ai ishte autor i 12 publikimeve shkencore dhe dy teksteve universitare, dhe kishte kontribuar në projekte ndërkombëtare akademike përmes programeve Tempus dhe Erasmus+, duke mbështetur shkëmbimin e eksperiencave dhe modernizimin e praktikave të sportit shqiptar. Përtej angazhimit akademik, Pogoni luajti rol të rëndësishëm edhe në sportin elitar: ka shërbyer si drejtor sporti në Bashkinë e Tiranës dhe në vitet e fundit ishte një nga figurat drejtuese të Barleti Volej, ku kontribuoi edhe si trajner i ekipit të femrave.
Emri i tij ishte i pranishëm në debatet publike për problematikat e sportit shqiptar, ku shpesh ngriti shqetësime për mënyrën e organizimit dhe funksionimit të federatave sportive. Me ndarjen nga jeta, Shqipëria humbet një pedagog, studiues dhe kontribues të rëndësishëm në fushën e sportit. Kolegë, studentë dhe sportistë kanë shprehur dhimbjen për humbjen e një profesionisti që punoi për edukimin dhe zhvillimin e brezave të rinj. Artan Pogoni do të kujtohet si një nga zërat e lidhjes mes shkencës dhe sportit në Shqipëri.
