Franca dhe Spanja po përballen me valën më të rëndë të zjarreve në historinë e tyre të fundit, me mbi 250,000 persona të detyruar të largohen nga banesat. Flakët vazhdojnë të përhapen me shpejtësi për shkak të temperaturave të larta, thatësirës dhe erërave të forta, pavarësisht angazhimit të qindra zjarrfikësve dhe mjeteve ajrore.
Në Francë autoritetet kanë evakuuar rreth 197,000 banorë në zonat pranë Bordosë, ku po zhvillohet zjarri më i madh i regjistruar ndonjëherë në vend. Në gadishullin Cap Ferret janë larguar rreth 44,000 persona, shumë prej tyre me mjete lundruese, ndërsa mbi 50 banesa janë shkatërruar. Presidenti Emmanuel Macron ka urdhëruar angazhimin e ushtrisë dhe ka kërkuar ndihmë nga Bashkimi Evropian për përballimin e situatës. Në Françë janë angazhuar rreth 1,000 ushtarakë dhe një avion transporti ushtarak i pajisur për hedhjen e lëndëve kundër flakëve, ndërsa Bashkimi Evropian ka dërguar avionë zjarrfikës në të dy vendet. Deri tani rreth 22,000 hektarë janë djegur në Francë.
Edhe Spanja po përjeton një emergjencë të paprecedentë. Mbi 70,000 banorë janë evakuuar nga zonat në perëndim të Madridit, ku dy vatra të mëdha janë bashkuar në një zjarr të vetëm që autoritetet e konsiderojnë aktualisht të pamundur për t’u vënë nën kontroll. Kryeministri Pedro Sánchez deklaroi se prioritet absolut mbetet shpëtimi i jetëve dhe mbrojtja e zonave të banuara, duke paralajmëruar se orët në vijim do të jenë vendimtare për shkak të erërave të forta. Në provincën Guadalajara flakët kanë përfshirë rreth 32,000 hektarë.
Pavarësisht përpjekjeve të zjarrefikësve dhe përdorimit të mjeteve ajrore, kushtet klimatike — përfshirë temperaturat e larta, thatësirën dhe erërat — po nxisin përhapjen e shpejtë të zjarreve dhe vështirësojnë kontrolin e tyre. Autoritetet kombëtare dhe partnerët evropianë kanë vënë në lëvizje forca ushtarake, avionë zjarrfikës dhe ekipe shpëtimi për të përballuar emergjencën dhe për të mbrojtur banorët e prekur.
