Mbi 5,700 vdekje më shumë se niveli i pritshëm u regjistruan në Francë gjatë valës së të nxehtit të muajit qershor, sipas të dhënave paraprake të publikuara nga autoriteti shëndetësor Santé publique France. Raporti tregon se nga 17 qershori deri më 2 korrik u regjistruan 5,764 vdekje shtesë, prej të cilave pothuajse gjysma ndodhën vetëm gjatë periudhës 25–27 qershor. Autoritetet theksojnë se këto janë vdekje nga të gjitha shkaqet dhe se nuk mund t’i atribuohen ende drejtpërdrejt temperaturave të larta, megjithëse ndikimi i valës së të nxehtit konsiderohet i jashtëzakonshëm.
Vdekshmëria e tepërt është konstatuar në të gjitha grupmoshat mbi 15 vjeç, me ndikimin më të madh te personat mbi 45 vjeç. Nga 5,764 vdekjet shtesë, 3,719 i përkasin personave 75 vjeç e lart, duke konfirmuar se të moshuarit mbeten grupi më i rrezikuar. Në grupmoshën 45–64 vjeç janë regjistruar 979 vdekje shtesë, ose 55% më shumë se niveli i pritshëm.
Autoritetet bëjnë të ditur se 98.5% e popullsisë franceze u prek nga temperaturat ekstreme, ndërsa vala e të nxehtit përfshiu 92 rajone administrative. Situata më e rëndë u regjistrua në rajonin e Parisit, Île-de-France, ku janë raportuar 1,999 vdekje shtesë, gati dyfish i nivelit normal.
Shifrat paraprake kanë nxitur debat politik në Francë, me opozitën që akuzon qeverinë për mungesë përgatitjeje për përballimin e temperaturave ekstreme. Autoritetet shëndetësore argumentojnë se vala e të nxehtit e këtij viti ishte e pazakontë për shkak të fillimit të hershëm, kohëzgjatjes dhe shtrirjes së saj në pothuajse të gjithë territorin francez.
Ekspertët paralajmërojnë se ekspozimi i zgjatur ndaj temperaturave të larta rrit ndjeshëm rrezikun për grupet më të cenueshme, përfshirë të moshuarit, fëmijët dhe personat me sëmundje kronike.
