Daniel Siad, një agjent francez i modeleve, i akuzuar për më shumë se një dekadë se organizonte takime mes grave të reja nga industria e modelimit dhe të dënuarit për abuzim seksual Jeffrey Epstein, është gjetur i vdekur në banesën e tij në Colombes, në periferi të Parisit. Lajmin e konfirmoi zëvendësprokurorja e Gjykatës së Nanterre, Marie-Celine Loverisy, dhe njoftoi se do të kryhet autopsia për të përcaktuar shkaqet e vdekjes.
Pak para se të vdiste, Siad i dha një intervistë CNN-së ku pretendoi se nuk kishte dijeni që dy gra që ai i kishte prezantuar Epsteinit më vonë e akuzuan atë për abuzim seksual. Ai tha se Epstein e kishte bindur se, pas dënimit të vitit 2008, kishte paguar për krimet e kryera dhe se ngjarje të tilla nuk do të përsëriteshin më. “I besoja atij dhe besoja se ky djalë ishte një profesionist”, deklaroi Siad.
Dokumentet e publikuara nga Departamenti Amerikan i Drejtësisë tregojnë se Epstein i kishte paguar Siadit dhjetëra mijëra dollarë. Në të njëjtat dosje përfshihen mesazhe ku agjenti francez e informonte Epstein për gra të reja që kishte takuar dhe, në disa raste, i dërgonte fotografi të modeleve ose kandidateve për asistente. Në një nga bisedat e publikuara, pasi Siad i dërgoi një fotografi të një gruaje, Epstein iu përgjigj shkurt: “Shumë e madhe.” Emri i Daniel Siad shfaqet më shumë se 2,000 herë në dosjet e Departamentit që lidhen me çështjen Epstein.
Lidhjet e Epstein me industrinë e modës vazhdojnë të jenë objekt hetimi. Në Francë ishte në zhvillim një hetim penal ndaj Siadit; ai akuzohej edhe për sulm seksual. Një modele e kishte denoncuar për përdhunim, duke pretenduar se ngjarja kishte ndodhur në vitin 1990, kur Siad punonte në Francë. Siad i kishte mohuar vazhdimisht këto akuza.
