Të dhënat e Ministrisë së Drejtësisë britanike tregojnë se të burgosurit shqiptarë kanë kryer një numër të lartë telefonatash brenda burgjeve të Mbretërisë së Bashkuar. Sipas shifrave, tetë të burgosur shqiptarë kanë realizuar gjithsej 37,307 telefonata, një mesatare rreth 207 thirrjesh në ditë për person, ndërsa në total telefonatat që lidhen me shtetas shqiptarë arrijnë 157,962. Pas Shqipërisë, numrin më të madh të telefonatave e kanë regjistruar të burgosurit irlandezë me 73,541 thirrje nga 678 persona, ndërsa shtetasit amerikanë kanë kryer 57,867 telefonata nga 68 të burgosur.
Prof. Ian Acheson, ish-guvernator burgu dhe ish-këshilltar qeveritar për ekstremizmin në burgje, tha se numri i telefonatave nga të burgosurit shqiptarë kërkon vëmendje të veçantë, duke vënë në dukje rolin e krimit të organizuar shqiptar në shpërndarjen e drogës brenda burgjeve dhe mundësinë që disa komunikime të lidhen me organizimin e veprimtarive kriminale. Deklaratat vijnë edhe pas paralajmërimeve të ish-sekretarit britanik të drejtësisë, David Lammy, i cili tha se drejtues të grupeve kriminale po vazhdojnë të menaxhojnë aktivitetet e tyre nga brenda burgjeve, se krimi i organizuar po koordinohet gjithnjë e më shumë nga persona të burgosur dhe se përdorimi i dronëve për futjen e drogës dhe armëve në burgje është në rritje.
Autoritetet britanike deklarojnë se shtetasit shqiptarë të dënuar në Mbretërinë e Bashkuar kryesisht përfshihen në vepra penale lidhur me drogën dhe vjedhjet. Agjencia Kombëtare Kundër Krimit (NCA) thotë se grupet kriminale shqiptare janë përfshirë gjerësisht në kultivimin e kanabisit në Britani, duke zëvendësuar ndonjëherë grupet vietnameze dhe duke shfrytëzuar kërkesën e lartë dhe mundësinë e prodhimit brenda territorit pa transport ndërkufitar.
Të dhënat mbi telefonatat u publikuan nga sekretari i drejtësisë Nick Timothy, i cili kërkoi publikimin e statistikave të plota mbi kriminalitetin sipas kombësisë dhe më shumë transparencë. Një zëdhënës i shërbimit të burgjeve tha se të dhënat nuk lejojnë nxjerrjen e përfundimeve direkte për kombësinë e personave që kryejnë telefonatat dalëse, se të gjitha telefonatat regjistrohen dhe monitorohen sipas rregullave, dhe se pagesa e tyre bëhet nga vetë të burgosurit. Telefoni në burgje lejohet vetëm drejt numrave të miratuar paraprakisht dhe mund të monitorohet kur ekzistojnë dyshime për lidhje me veprimtari kriminale.
