Forcat e Mbrojtjes së Izraelit (IDF) dhe agjencia e sigurisë Shin Bet njoftuan se kanë vrarë një komandant të lartë të Hamasit, Adam Ibrahim Shaaban Nasman, i cili dyshohet se kishte mbajtur pengje izraelite në Gaza. Në një deklaratë të përbashkët të publikuar të martën, autoritetet thanë se Nasman u vra gjatë fundjavës dhe se ai ishte kreu i operacioneve të Brigadës së Hamasit në Gaza.
Sipas deklaratës, Nasman shërbente si komandant i Batalionit Nuhba dhe kishte udhëhequr operacionin e militantëve të Hamasit në territorin izraelit gjatë sulmit të 7 tetorit. Izraeli pretendon gjithashtu se Nasman kishte mbajtur disa prej pengjeve të marra gjatë sulmit, përfshirë emra të identifikuar si Romy Gonen, Emily Damari, Ziv dhe Gali Berman, Eitan Mor, Matan Angrest dhe Omri Miran.
Ish-pengu Zvi Berman reagoi në rrjetet sociale pas njoftimit për vdekjen e Nasman, duke shprehur mbështetje për operacionin izraelit dhe duke falënderuar forcat që morën pjesë në të. Në reagimin e tij, i cili u citua nga mediat, Berman tha: “Një copë tjetër mbeturinash është dërguar në deponinë gjigante të mbeturinave të Hamasit në ferr.”
Autoritetet izraelite deklaruan se Nasman kishte mbajtur edhe poste të tjera të rëndësishme brenda Hamasit, përfshirë rolin e oficerit të inteligjencës për Brigadën e Qytetit të Gazës dhe komandantin e Batalionit Al-Shati. Sipas tyre, ai ishte angazhuar së fundmi në trajnimin e militantëve të Hamasit dhe në forcimin e kapaciteteve ushtarake të grupit, duke përfshirë prodhimin dhe shpërndarjen e armëve.
Në deklaratë u theksua se “Forcat e Mbrojtjes së Izraelit dhe Shin Bet do të vazhdojnë të veprojnë kundër kërcënimeve dhe të ruajnë sigurinë e qytetarëve izraelitë”, dhe u shtua se trupat izraelite do të vijojnë të qëndrojnë në Gaza. Njoftimi u publikua nga burimet zyrtare izraelite dhe u transmetua nga Top Channel.
