Protestuesit u mblodhën për të 49-ën ditë përpara Kryeministrisë, duke vijuar thirrjet dhe duke ripërsëritur pesë kërkesat që lexohen në çdo tubim prej javësh. “Nuk do lëvizim nga sheshi deri sa të plotësohen 5 kërkesat”, u shpreh një protestues. Thirrjet për revolucion dhe ndryshimin e klasës politike vazhdojnë të dëgjohen në protesta.
Pesë kërkesat që protestuesit paraqesin janë: 1) dorëheqja e panegociueshme e kryeministrit dhe e gjithë qeverisë; 2) krijimi i një qeverie teknike tranzitore për jo më pak se 12 muaj; 3) ndryshime kushtetuese dhe miratimi i tyre me referendum, përfshirë ndryshimin e Kodit Zgjedhor, që sipas tyre ka marrë peng vendin që prej vitit 2008; 4) ndryshime në ligjin për financimin e partive politike, me arsyetimin se përmes tij partite financohen nga paraja e krimit dhe drogës; 5) kufizimi i ushtrimit të detyrës së kryeministrit në jo më shumë se dy mandate.
Protesta e ditës pasoi mbledhjen për herë të parë të “Kuvendit Kombëtar të Protestës”, të thirrur nga organizatorët. Ajo u shoqërua me tensione dhe përplasje midis pjesëmarrësve, pasi duket se dakordësia për mbledhjen nuk ishte e plotë. Tensionet nuk ishin vetëm në mbledhjen e “Kuvendit” por edhe në shesh: një protestues që po fliste në podiumin e improvizuar para Kryeministrisë u ndërpre nga një tjetër, i cili i kërkoi të mbyllte fjalën.
Nga sheshi protestuesit u distancuan nga kjo mbledhje dhe “Kuvend”, duke theksuar se përfaqësuesit janë në shesh dhe se nuk do të ketë negociata nëpër zyra. Protestat vazhdojnë të mbajnë fokusin te kërkesat për dorëheqje të qeverisë, ndërrim të strukturave dhe rregullave zgjedhore e financuese, si dhe te kërkesa për një periudhë tranzitore të qeverisjes teknike.
