Nën temperaturat e larta të këtyre ditëve, banorët e fshatit Morin po përballen me mungesën e ujit të pijshëm. Për shkak të dëmtimit të një tubacioni, furnizimi me ujë është ndërprerë dhe komuniteti është mobilizuar për ta riparuar vetë problemin. Me një eskavator të vogël të marrë me pagesë dhe me punën e tyre, banorët kanë dalë në terren për ndërhyrje emergjente, duke u angazhuar drejtpërdrejt në riparimin e rrjetit të ujësjellësit.
Sipas banorëve, dëmtimi i tubacionit ka ndodhur gjatë punimeve për vendosjen e shtyllave elektrike. Për shkak të mungesës së ndërhyrjes nga institucionet përgjegjëse, ata thonë se janë detyruar të zgjidhin vetë defektin për të siguruar furnizimin me ujë. Kontributi financiar për punimet e riparimit po vjen nga familjet e fshatit, ndërsa pjesë të kostove përballohen edhe me ndihmën e fëmijëve të tyre që jetojnë në emigracion.
Banorët kujtojnë se ujësjellësi i fshatit është ndërtuar vite më parë me kontributet e familjeve të Morinit, dhe se investimi më i fundit për furnizimin me ujë është bërë në vitin 2008. Sipas tyre, ajo ndërhyrje zgjati vetëm pak ditë dhe nuk solli zgjidhje afatgjatë. Ata vënë në dukje se nga ndërtimi fillestar i ujësjellësit deri te riparimet aktuale, banorët janë përballur me shpenzime të përsëritura — “kanë paguar dy herë” — për të pasur ujë në shtëpitë e tyre.
Punimet për riparimin e tubacionit vazhdojnë edhe tani, megjithë temperaturat e larta që vështirësojnë punën. Banorët presin ndërhyrjen e institucioneve përgjegjëse, por mbetet ende pa përgjigje se kur do të vijë ajo mbështetje institucionale dhe nëse do të ketë një zgjidhje të qëndrueshme për furnizimin me ujë të pijshëm në Morin.
Top Channel
