Një gjykatë në Spanjë ka shpallur fajtor David Sánchez, vëllain e kryeministrit Pedro Sánchez, për shpërdorim detyre lidhur me emërimin e tij në një post publik në rajonin e Extremadurës, dhe e ka ndaluar atë të ushtrojë funksione publike për nëntë vjet. David Sánchez, kompozitor dhe dirigjent, ishte një nga 11 personat që u gjykuan në muajin maj nën akuzat për shpërdorim detyre dhe trafik ndikimi; gjykata e Badajozit e shpalli fajtor vetëm për shpërdorim detyre dhe e liroi nga akuza për trafik ndikimi.
Sipas vendimit, posti si koordinator i shkollave publike të muzikës, në të cilin ai u emërua në vitin 2017, nuk ishte “i nevojshëm apo urgjent” dhe ishte krijuar “në interes të personit të emëruar, e jo në interes publik”. Gjykata po ashtu theksoi se nuk u provua që për emërimin të ishte ushtruar presion apo ndikim politik. Nëse do të ishte shpallur fajtor edhe për trafik ndikimi, David Sánchez mund të përballej me deri në tre vite burg.
Në të njëjtin proces, nëntë të pandehur të tjerë morën gjithashtu ndalime 9-vjeçare për të mbajtur poste publike. Ndërsa ish-drejtuesi socialist i Extremadurës, Miguel Ángel Gallardo, u dënua me ndalim 18-vjeçar nga funksionet publike për dy raste të shpërdorimit të detyrës. Vendimet janë të apeluara.
Çështja ka shtuar presionin politik ndaj kryeministrit Pedro Sánchez, pasi qeveria dhe familja e tij janë përballur me akuza të shumta për korrupsion muajt e fundit. Opozita ka kërkuar vazhdimisht zgjedhje të parakohshme, ndërsa të gjithë të akuzuarit kanë mohuar çdo shkelje. Pedro Sánchez ka mbrojtur publikisht vëllain dhe bashkëshorten e tij, Begoña Gómez, e cila gjithashtu përballet me akuza për korrupsion, trafik ndikimi dhe shpërdorim fondesh publike, duke cilësuar hetimet si pjesë të një fushate politike dhe mediatike kundër familjes dhe deklaruar se “e vërteta do të dalë në dritë” dhe se të afërmit e tij janë të pafajshëm.
Pas vendimit, lideri i Partisë Popullore, Alberto Núñez Feijóo, deklaroi se askush nuk duhet të jetë mbi ligjin, ndërsa kreu i partisë së ekstremit të djathtë Vox, Santiago Abascal, e quajti Partinë Socialiste (PSOE) “mafia”. Qeveria spanjolle shprehu besimin se vendimi do të rrëzohet në instancat më të larta gjyqësore dhe se pafajësia e David Sánchez do të provohet gjatë procesit të apelimit.
