Detaje të reja nga hetimet për vrasjen e 55-vjeçares Bardhe Ziçi në Shkodër tregojnë se i dyshuari kryesor është bashkëshorti i saj, 62-vjeçari Shtjefën Ziçi. Sipas burimeve hetimore, policia ka sekuestruar kamerat e sigurisë së banesës së çiftit, ku pretendohet se shfaqet i dyshuari duke marrë armën e gjahut dhe më pas duke iu afruar derës kryesore të oborrit.
Nga pamjet e administruara hetuesit dyshojnë se autori i dyshuar ka lëvizur me qetësi, ka kontrolluar ambientin përreth dhe më pas ka hyrë në banesë, ku ka qëlluar ndaj bashkëshortes së tij, duke i shkaktuar vdekjen. Një foto e siguruar për Top Channel nga gazetarja Dorjana Bezat tregohet si momenti kur 62-vjeçari merr çiften dhe shkon drejt bashkëshortes.
Hetimet paraprake tregojnë se pas ngjarjes Shtjefën Ziçi nuk është larguar nga vendi i krimit, por ka qëndruar aty deri në mbërritjen e forcave të policisë, ku u arrestua menjëherë. Hetuesit po e fokusojnë pistën kryesore të hetimit te motivet e xhelozisë dhe po vijon puna për zbardhjen e plotë të rrethanave që çuan në konfliktin mes çiftit.
Mësohet se pak para krimit kishte pasur një debat mes bashkëshortëve. Sipas dyshimeve të ngritura gjatë hetimit, një telefonatë që ka marrë Bardhe Ziçi mund të ketë qenë një nga shkaqet që solli përplasjen mes tyre. Autoritetet nuk e kanë përcaktuar ende nëse telefonata ka ardhur nga fëmijët e çiftit — duke përfshirë djalin që jeton në Kanada — nga vajza apo nga persona të tjerë të afërm.
Shtjefën Ziçi akuzohet për veprën penale “Vrasje për shkak të marrëdhënieve familjare”. Nëse shpallet fajtor, ai rrezikon dënim deri në burgim të përjetshëm. Lajmi është raportuar nga Top Channel.
