Ndërsa vendi festonte përvjetorin e fitores së Botërorit, me nostalgji për futbollin italian dhe trishtim për mungesën në tri Botërorët e fundit, kombëtarja e “Të Kaltërve” kërkon të rindërtojë gjithçka pas natës dramatike të Zenicës. Rindërtimi po drejtëzohet nga presidenti i ri i Federatës Italiane të Futbollit, Giovanni Malago, i cili po përqendrohet në emërimin e Drejtorit Teknik si hapin e parë për rilindjen e skuadrës katër herë kampione të botës.
Malago ka përshkruar këtë si javën vendimtare për pozicionin, duke thënë se po punon intensivisht dhe se shpreson të zgjidhë çështjen brenda fundjavës, madje duke lënë të hapur mundësinë e një surprize. Emri i kandidatit mbetet mister dhe, me kalimin e ditëve, zvogëlohen mundësitë që favorite i parë të marrë detyrën: Paolo Maldini, zgjedhja fillestare e Malagos. Presidenti i FIGC ende pret, por rritet bindja se Maldini mund të refuzojë, pjesërisht për shkak të nevojës për të zhvendosur jetën në Romë, gjë që konsiderohet e vështirë për të.
Malago ka theksuar se, pasi të zgjidhet Drejtori Teknik, do të jetë më e lehtë të vijojë puna për zgjedhjen e trajnerit të ri, duke përsëritur gjithashtu se mund të ketë surpriza. Në garë për postin janë disa emra, me dy ish-shokë skuadre të Maldinit te Milani, Alessandro Costacurta dhe Demetrio Albertini, që mbahen në pole position. Më të largët, por të përmendur si mundësi nga disa anëtarë të Federatës janë edhe Giuseppe Bergomi dhe Gianfranco Zola.
Federata synon të marrë vendimin shpejt: brenda së dielës pritet të jenë të qarta të gjitha dyshimet për pozicionin e Drejtorit Teknik të Italisë. Lajmi u përcjell nga Top Channel.
