Një ngjarje e rëndë në Ottawa, Kanada, po hetohet si rast vrasjeje dhe vetëvrasjeje, pasi 40-vjeçari Mohammed Al-Lami dyshohet se vrau dy djemtë e tij, 7 dhe 12 vjeç, në banesën e tij. Policia thotë se më pas ai dyshohet se i vuri zjarrin klinikës dentare ku punonte duke përdorur bomba molotov, dhe më vonë u vetëdogj brenda automjetit të tij. Autoritetet kanadeze kanë nisur një hetim lidhur me ngjarjen.
Hetimet kanë nxjerrë në dritë probleme ligjore të mëparshme midis Al-Lamit dhe ish-bashkëshortes së tij, e cila është edhe nëna e fëmijëve të vrarë. Dokumentet gjyqësore tregojnë se në vitin 2024 ai kishte qenë nën masë mbikëqyrjeje pas akuzave për kërcënim ndaj ish-gruas. Në zyrën e tij u gjet një shënim disa faqesh në të cilin ai kritikonte ashpër ish-bashkëshorten, sistemin e drejtësisë dhe gjykatat familjare; në dokument ai përmendte disa persona që i konsideronte përgjegjës për problemet e tij, çka bëri që autoritetet të merrnin masa për sigurinë e atyre personave.
Ish-bashkëshortja deklaroi në gjykatë se çifti u martua dhe pati dy fëmijë para se të ndaheshin në vitin 2022. Ajo tha se ishte shqetësuar nga mesazhet kërcënuese të ish-partnerit dhe se kishte kërkuar ndihmë nga autoritetet për shkak të frikës për sigurinë e saj dhe të fëmijëve. Sipas mediave lokale, ajo tha se ishte tronditur nga përmbajtja e emaileve dhe kishte ngritur shqetësimin se kërcënimet mund të ktheheshin në veprime reale.
Në muajin shkurt të këtij viti, Al-Lami ishte paraqitur vetë në gjykatë dhe kishte refuzuar një marrëveshje të propozuar nga sistemi i drejtësisë për një periudhë monitorimi me sjellje të mirë; më pas gjykata i kishte vendosur një periudhë prove 12-mujore. Autoritetet vazhdojnë hetimet për rrethanat e ngjarjes dhe për veprimet që çuan deri te vdekjet e dy fëmijëve dhe vdekja e dyshuar e autorit.
