Mijëra kundërshtarë të Alternativës për Gjermaninë bllokuan hyrjen e godinës ku po mbahej kongresi i partisë në Erfurt, duke dalë në rrugë për të protestuar kundër forcës së ekstremit të djathtë. Në demonstrata morën pjesë sindikata, organizata të shoqërisë civile dhe parti të majta, ndërsa policia angazhoi forca të shumta nga e gjithë Gjermania për të garantuar sigurinë gjatë konferencës dyditore. Autoritetet raportuan se rreth 15 mijë persona morën pjesë në protestat në dhe rreth Erfurtit.
“Duam ta bëjmë të qartë se nuk do ta tolerojmë rritjen e fashizmit në Gjermani”, deklaroi Georg Becker, zëdhënës i grupit kundër AfD-së, “Widersetzen” apo “Rezistoni”. Kongresi i AfD-së zhvillohet ndërsa partia ecën mirë në sondazhe kombëtare; bashkëkryetarët Alice Weidel dhe Tino Chrupalla pritet të rizgjidhen në krye të partisë. Zgjedhjet e ardhshme në disa lande lindore konsiderohen vendimtare për ambiciet politike të AfD-së.
E themeluar më shumë se një dekadë më parë, AfD-ja ka fituar mbështetje të konsiderueshme përmes retorikës nacionaliste, kërkesave për politika më të ashpra ndaj emigracionit dhe për shkak të pakënaqësisë së votuesve me qeveritë e njëpasnjëshme si dhe stanjacionit ekonomik. Kundërshtarët e partisë e akuzojnë atë për promovim të politikave raciste dhe për cenim të vlerave demokratike të Gjermanisë. Partitë tradicionale vazhdojnë të refuzojnë çdo bashkëpunim me AfD-në përmes strategjive që synojnë ta mbajnë atë jashtë qeverisjes.
Sondazhet e fundit tregojnë se AfD-ja gëzon rreth 29 për qind të mbështetjes në nivel kombëtar, krahasuar me 22 për qind të bllokut konservator CDU/CSU të kancelarit Friedrich Merz. Në landin e Saksoni-Anhaltit partia kryeson me rreth 41 për qind dhe synon të dalë fituese, ndërsa synimet e saj përfshijnë edhe të bëhet forca më e madhe politike në Mecklenburg-Pomeraninë Perëndimore. Kongresi i AfD-së dhe protestat përreth pasqyrojnë përplasjen e vazhdueshme politike rreth rolit dhe ndikimit të kësaj force në skenën politike gjermane.
