Marcelo Bielsa njihet si një nga “profesorët” më obsesivë të futbollit. Për të, çdo detaj në fushë është një ekuacion që duhet zgjidhur përmes orëve të tëra analizash me video dhe diskutimesh taktike. Megjithatë, edhe për “El Loco” është shfaqur një kufizim që nuk arrin ta mposhtë: përqendrimi i reduktuar i futbollistëve modernë.
Në një deklaratë që po qarkullon në rrjetet sociale, trajneri i Uruguait rrëfeu një prapaskenë nga dhoma e zhveshjes: lojtarët i kërkuan zyrtarisht që të ndalë “ligjëratat” e gjata, sepse nuk mbajnë dot mendjen më shumë se 10 minuta. “Lojtarët më kërkuan të reduktoja bisedat kolektive për ndeshjet e kaluara. Unë gjithmonë kam menduar se analiza e gabimeve dhe virtyteve të asaj që u bë ishte diçka e dobishme,” u shpreh Bielsa, duke shfaqur një lloj zhgënjimi filozofik për ndryshimin në mënyrën e të kuptuarit të futbollit.
Sipas trajnerit, çështja nuk është vetëm te ekipi i tij, por është pjesë e një trendi më të gjerë: sindroma “TikTok” po pushton dhomat e zhveshjes. Në epokën e videove 15-sekondëshe në TikTok dhe Instagram, ku informacioni duhet të jetë i shpejtë dhe me ngjyra, analizat taktike të gjata — si ato prej 45 minutash — duken si leksione të mërzitshme për futbollistët e rinj. Në këtë kontekst, diskutimet e detajuara taktike që dikur ishin themeli i përgatitjes po përballen me kufizimet e vëmendjes së brezit që rritet me përmbajtje të shpejtë vizuale.
Për Bielsën, i cili kohë më parë kalonte netët pa gjumë duke parë kaseta VHS për të studiuar lëvizjet e sulmuesve kundërshtarë, ky ndryshim i zakoneve dhe i qasjes te përgatitja është një realitet i ri dhe i vështirë për t’u pranuar. (Top Channel)
