Një familje me origjinë nga Bangladeshi është gjetur e vrarë me thikë në një apartament në periferinë perëndimore të Romës, në zonën Casalotti. Viktimat janë prindërit Kamal Udiu, 39 vjeç, dhe Arzu Udiu, 38 vjeç, dhe vajza e tyre 8-vjeçare. Ngjarja ka ndodhur mbrëmjen e së premtes në një banesë në Via Montiglio, ndërsa fqinjët raportuan britma rreth orës 22:00 dhe panë një person që largohej me vrap nga vendngjarja.
Djali i familjes, 20 vjeç, ka mbijetuar me plagë dhe po merr trajtim në Poliklinikën Gemelli në Romë. Ai është marrë në pyetje nga autoritetet. Sipas hetimeve paraprake, një sherr i papritur brenda banesës ka degjeneruar në një sulm fatal, dhe prindërit dyshohet se kanë tentuar të mbrojnë vajzën e tyre. Një mik i djalit është shpallur në kërkim nga policia si i dyshuar kryesor.
Policia ka nisur një operacion të gjerë kërkimi, duke përdorur edhe dronë me kamera infra të kuqe për të kontrolluar zonat përreth dhe pyllëzimet pranë Casalotti-t. Hetuesit besojnë se sulmuesi mund të ketë qenë i njohur për familjen dhe se viktimat mund ta kenë lejuar atë të hynte në banesë. Sipas fqinjëve, personi që u largua nga ndërtesa ishte i veshur me një bluzë blu.
Hetuesit po analizojnë kamerat e sigurisë në zonë dhe telefonat celularë të familjes për të rindërtuar kontaktet e fundit dhe për të përcaktuar lëvizjet e mundshme të autorit. Në vendngjarje kanë mbërritur shërbimet e emergjencës, por mjekët kanë konstatuar vdekjen e prindërve dhe vajzës në vend. Zona është izoluar nga policia, ndërsa forcat hetimore kanë marrë në pyetje banorët dhe të njohurit e familjes.
Autoritetet po hetojnë të gjitha pistat e mundshme; motivi i krimit mbetet i paqartë. Hetuesit thonë se i dyshuari mund të ketë lënë Romën, por kërkimet vazhdojnë në të gjithë rajonin.
