Drejtoria e Përgjithshme e Burgjeve njofton se vijon kontrollet e pandërprera dhe zbatimin e politikës së tolerancës zero ndaj çdo shkeljeje të ligjit dhe cenimit të sigurisë në institucionet e ekzekutimit të vendimeve penale. Në Institucionin e Ekzekutimit të Vendimeve Penale (IEVP) Durrës, pas analizës së riskut ndaj punonjësve të evidentuar me prirje për përfshirje në futjen e sendeve të ndaluara dhe bazuar në informacionet e siguruara në bashkëpunim me Agjencinë e Mbikëqyrjes në Sistemin e Ekzekutimit të Vendimeve Penale, u bë e mundur kapja në flagrancë e një punonjësi të Policisë së Burgjeve. Ky punonjës tentoi t’i kalonte një të paraburgosuri lëndë të dyshuar narkotike; ai u pezullua menjëherë nga detyra dhe gjatë kontrollit fizik iu gjet edhe një sasi tjetër e dyshuar me lëndë narkotike. Në IEVP Fier, gjatë kontrolleve në ambientet e paraburgimit, u gjetën dhe u sekuestruan dy telefona celularë dhe një fishë karikimi, pa autor të identifikuar. Të dyja rastet po ndiqen në bashkëpunim me Agjencinë e Mbikëqyrjes në Sistemin e Ekzekutimit të Vendimeve Penale për kryerjen e veprimeve të mëtejshme procedurale dhe hetimore. Drejtoria e Përgjithshme e Burgjeve thekson angazhimin e saj për zbatimin e ligjit dhe forcimin e masave që synojnë garantimin e rendit, sigurisë dhe integritetit në të gjitha institucionet e ekzekutimit të vendimeve penale.
Aksion ‘blic’ në burgun e Durrësit: Punonjësi i policisë kapet në flagrancë me lëndë narkotike dhe pezullohet
