Dhjetë vjet pas referendumit të 23 qershorit 2016, Britania e Madhe vazhdon të përballet me pasojat e Brexit-it, të cilat nuk sollën kolapsin e menjëhershëm ekonomik, por ndikuan gradualisht në ekonomi, tregti, investime dhe stabilitet politik. Sipas vlerësimeve të ndryshme, dëmi afatgjatë në prodhimin e brendshëm bruto llogaritet midis 4% dhe 8%. Zyra për Përgjegjësinë Buxhetore vlerëson se regjimi i ri tregtar do të ulë produktivitetin me rreth 4% në afat të gjatë, çka përkthehet në të ardhura më të ulëta nga taksat, më pak investime publike dhe perspektiva më të dobëta për rritjen e pagave.
Dalja nga tregu i përbashkët evropian solli kontrolle kufitare, burokraci shtesë, rregulla të reja dhe vonesa në qarkullimin e mallrave. Megjithëse Britania nënshkroi marrëveshje të reja tregtare me vende të tjera, asnjëra nuk ka zëvendësuar përfitimet e afërsisë me tregun evropian, ende partnerin kryesor tregtar. Sektore të tilla si bujqësia, industria ushqimore dhe eksportuesit e produkteve të detit përballen me kosto dhe pengesa administrative që kanë reduktuar konkurrueshmërinë; për bizneset e vogla, procedurat e reja kanë kufizuar ose ndërprerë aktivitetin tregtar me BE-në.
Brexit ndikoi edhe në klimën e investimeve: pas referendumit shumë kompani shtynë ose pezulluan planet për shkak të pasigurisë. Investimet u rikuperuan pjesërisht, por në ritme më të ulëta; disa kompani transferuan aktivitete në vende të tjera evropiane, ndërsa qytete si Amsterdami dhe Dublini tërhoqën aktivitete financiare që më parë zhvilloheshin në Londër.
Për kontrollin e emigracionit, efektet rezultuan komplekse: emigracioni nga vendet e BE-së u ul ndjeshëm, por u zëvendësua nga rritje e migracionit nga vendet jashtë bllokut, duke ndryshuar strukturën e tregut të punës, sidomos në shëndetësi, kujdes social, hotelieri dhe industrinë ushqimore.
Politikisht, vendi ka kaluar periudha paqëndrueshmërie me ndryshime të shpeshta qeverish dhe kryeministrash; Partia Konservatore ka përjetuar përçarje të brendshme, ndërsa opozita laburiste ka pasur vështirësi për të përcaktuar një qëndrim të qartë. Sondazhet tregojnë se një pjesë e konsiderueshme e publikut sheh rezultate më të dobëta nga sa pritej dhe mbështetje për afrime të reja me BE-në në disa anketa kalon 50%, por nuk ekziston një plan konkret për rikthim. Largimi nga mekanizmat si tregu i përbashkët, bashkimi doganor dhe lëvizja e lirë mbetet i përjashtuar zyrtarisht nga Qeveria, ndërsa debati rreth kostove dhe mundësive të humbura vazhdon.
