Një ngjarje tronditëse ka ndodhur në Holandë, ku një vajzë 15-vjeçare nga Groningen është arrestuar nën dyshimin se ka vrarë me thikë prindërit e saj dhe më pas ka shpërndarë fotografi nga vendi i krimit te shokët e klasës përmes një aplikacioni. Viktimat, të identifikuar në media si Johan dhe Mathilde, të dy 53 vjeç, u gjetën të vdekur në banesën e tyre të enjten e kaluar; autoritetet raportojnë se të dy kishin marrë plagë të shumta me thikë.
Hetimet paraprake tregojnë se adoleshentja dyshohet se ka sulmuar edhe qenin e familjes, një Golden Retriever, i cili mbeti i plagosur; gjendja e kafshës nuk është bërë ende e ditur. Sipas gazetës holandeze De Telegraaf, 15-vjeçarja ka fotografuar vendin e krimit dhe ua ka dërguar imazhet miqve dhe shokëve të klasës. Dëshmitarë të cituar nga mediat vendase përshkruajnë se në fotografi shiheshin të dy prindërit të shtrirë në dysheme pas sulmit fatal.
Autoritetet po hetojnë profilin dhe gjendjen psikologjike të të miturës, e cila vazhdon të mbahet në paraburgim. Mediat lokale kanë raportuar se vajza dyshohet se e identifikonte veten si qen, por policia nuk ka konfirmuar zyrtarisht këtë informacion dhe nuk ka dhënë detaje mbi motivet e mundshme të krimit. Policia dhe hetuesit vijojnë punën për të zbardhur plotësisht rrethanat e kësaj vrasjeje të dyfishtë.
Ngjarja ka marrë vëmendje të gjerë në media vendase për shkak të natyrës së sulmit, përfshirjes së fotografive të vendit të krimit dhe mosqartësive rreth motivit dhe gjendjes psikologjike të të dyshuarës. Hetimet janë në zhvillim e sipër dhe autoritetet nuk kanë dhënë deri tani shpjegime të detajuara mbi shkakun apo motivet e veprës.
