Algjeria arriti një fitore me përmbysje 2-1 kundër Jordanisë në ndeshjen e Grupit J të Kupës së Botës 2026, e zhvilluar në “San Francisco Bay Area Stadium”. Ky rezultat eliminon zyrtarisht Jordaninë, që mori pjesë për herë të parë në këtë kompeticion.
Ndeshja nisi me ritëm të lartë; Amine Gouiri rrezikoi i pari për Algjerinë, ndërsa Mousa Tamari u përgjigj me një goditje nga distanca që u ndal nga portieri Luca Zidane. Megjithëse Algjeria domionte lojën dhe krijonte raste përmes Riyad Mahrez dhe Gouiri, ishte Jordania që kaloi e para në avantazh rreth 10 minuta para përfundimit të pjesës së parë. Pas një krosimi të Mahmoud Al Mardi, Nizar Al Rashdan shfrytëzoi situatën duke dërguar topin në rrjetë në minutën e 36-të.
Në pjesën e dytë, “Desert Warriors” (Luftëtarët e Shkretëtirës) shpërthyen me më shumë agresivitet për të shmangur eliminimin. Presioni i tyre u shpërblye pak para ndërprerjes së dytë për hidratim, kur Nadir Benbouali u ngrit më lart se të gjithë dhe barazoi me një kokë pas një goditjeje këndi të ekzekutuar nga Mahrez, në minutën e 69-të. Përmbysja përfundimtare erdhi në minutat e fundit të kohës së rregullt: pas një tjetër goditjeje këndi, Amine Gouiri shtyu topin në rrjetë, një gol që u konfirmua edhe pas rishikimit me sistemin VAR, në minutën e 82-të.
Me këtë humbje, Jordania përfundon aventurën e saj historike dhe ndeshjen e fundit do ta luajë kundër Argjentinës së Lionel Messit për çështje prestigi. Ndërkaq Algjeria shkon për një përballje vendimtare kundër Austrisë për të përcaktuar se kush do të kualifikohet më tej së bashku me Albicelestet.
Rezultati përfundimtar: Jordani 1-2 Algjeri. Golat: Al Rashdan 36’ / Benbouali 69’, Gouiri 82’. Burimi: Top Channel.
