Presidenti francez Emmanuel Macron deklaroi se evropianët duhet të jenë në tryezën e negociatave sa herë dhe kudo zhvillohen bisedime paqeje për t’i dhënë fund luftës në Ukrainë. Ai u shpreh se gjithmonë ka mbështetur pikëpamjen që evropianët duhet të jenë në tryezën e negociatave, pasi kjo është në interes të Evropës, dhe shtoi se Antonio Costa mund të marrë pjesë në negociata të tilla për sa kohë roli i tij përcaktohet qartë. Fjalët e Macron u tha gjatë përfundimit të samitit të BE-së në Bruksel.
Presidenti i Këshillit Evropian, Antonio Costa, tha se BE-ja “nuk është dhe nuk ka ndërmend të jetë ndërmjetës” në negociatat për t’i dhënë fund luftës, duke theksuar se BE-ja “është në anën e Ukrainës” dhe do ta mbështesë atë “gjatë luftës dhe pas luftës”. Në një konferencë për shtyp pas përfundimit të Këshillit Evropian në Bruksel, Costa u përgjigj edhe për kontaktet me Moskën, duke thënë se për fat të keq nuk ka shenja të besueshme nga Rusia që dëshiron të marrë pjesë në negociata serioze për momentin.
Megjithatë, Costa shpjegoi se përmes zyrës së tij kërkon të mbajë një kanal diplomatik komunikimi me Rusinë, sepse “nuk mund të mbështetemi vetëm te të tjerët për të interpretuar mesazhet ruse” dhe BE-ja duhet të jetë në gjendje t’i përcjellë qëndrimet e veta drejtpërdrejt Moskës. Ai theksoi se nuk ka “asnjë kontradiktë” ose “konkurrencë” midis aktorëve të ndryshëm të përfshirë në përpjekjet e paqes, pasi rolet janë plotësuese: vetëm Ukraina mund të negociojë në emër të Ukrainës, ndërsa “koalicioni i të vullnetshmëve” mund të luajë një rol në garantimet e sigurisë. Costa theksoi gjithashtu se interesat e BE-së duhet të mbrohen nga institucionet e BE-së në përputhje me traktatet dhe se ai punon ngushtë me Presidenten e Komisionit Evropian, Ursula von der Leyen.
Ursula von der Leyen deklaroi se “Ukraina dëshiron paqe dhe Evropa dëshiron paqe”, ndërsa, sipas saj, “e vetmja që zgjedh vazhdimisht dhunën është Rusia”. Ajo tha se Evropa duhet të jetë “një nga arkitektët e një paqeje të drejtë dhe të qëndrueshme”, me Ukrainën në rolin udhëheqës dhe BE-në pranë saj.
