SPAK, në gjyqin e themelit ndaj ish-presidentit Ilir Meta dhe Monika Kryemadhit, ka vijuar paraqitjen e fakteve dhe të dhënave të hetimit, duke u ndalur te transaksionet për blerjen e apartamenteve në zonën e ish-Bllokut dhe marrëdhëniet financiare me familjen Kryemadhi. Prokurori Sotir Kllapi deklaroi se gjatë viteve 2008-2009 çifti ka jetuar në dy apartamente në ish-Bllok; Meta do të blinte një apartament në rrugën “Vaso Pasha” me vlerë 400 mijë euro, ndërsa një tjetër, një kat më poshtë, do ta blinte Fatime Kryemadhi me vlerë rreth 300-310 mijë euro. Prokuroria pretendon se një pjesë e këtyre transaksioneve nuk justifikohen me burime të ligjshme.
Sipas prokurorit, Monika Kryemadhi ka marrë disa overdrafte nga një bankë të nivelit të dytë, të cilat janë shlyer shpejt nga Fatime Kryemadhi, e cila në atë kohë ishte pensioniste. Ka dyshime se shumave të marra nga Monika nuk u është dhënë përdorimi i deklaruar, por janë depozituar nga Fatime. Në vitin 2009 bashkëshortët vendosën të blinin një banesë për 400 mijë USD; për shlyerjen kanë marrë një kredi prej 200 mijë USD dhe kanë pretenduar se do të përdornin 200 mijë USD cash, si shumë e mbetur nga një transaksion i pakryer për një vilë në Qerret. Fatime Kryemadhi rezulton se ka depozituar shuma cash dhe të dy kreditë janë shlyer në 7 muaj.
Prokuroria paraqiti shifra disbalancash: Fatime Kryemadhi rezulton me një disbalancë prej 810 mijë eurosh; për tre shuma të dokumentuara rezulton një disbalancë prej 846 mijë USD. SPAK tha se vetëm 200 mijë USD rezultojnë të ligjshme, si të ardhura nga kredia. Më tej u tha se mekanizmi i lidhjes së dy kontratave të ndryshme ishte përdorur për të futur në rrugë bankare shuma pa burim të ligjshëm, dhe as Meta, as Kryemadhi, as Fatime nuk kishin mundësi financiare për shumën e pretenduar; Fatime kishte mundësi vetëm për 100 mijë euro.
Në banesën e Fatimes u gjetën tre mandate për tërheqje në bankë, disa të firmosura nga personi që i shiti apartamentin bashkëshortëve. SPAK renditi gjithashtu pagesa të pajustifikuara nga çifti Meta-Kryemadhi, përfshirë pagesa për arsimimin e fëmijëve, pagesa në Londër dhe shpenzime mjekësore në Austri, të cilat sipas SPAK nuk janë deklaruar; nga të gjitha episodet nuk janë ngritur akuza për të gjitha rastet. Gjykata tërhoqi vëmendjen avokatit gjatë seancës, ndërsa avokati Cakrani komentoi se po flitet me perceptime.
