Një pjesë e stacionit historik Nithe, pjesë e ashtuquajturës “Hekurudha e Vdekjes” në Tajlandë, është shfaqur në sipërfaqe pas rreth 40 vjetësh të zhytur nën ujë. Zbulimi u bë i mundur pasi rezervuari i zonës u tha gjatë punimeve të mirëmbajtjes në një digë pranë, duke zbuluar mbetjet e strukturave që shërbenin për furnizimin me karburant përgjatë linjës hekurudhore që lidhte Tajlandën me Mianmarin gjatë Luftës së Dytë Botërore.
Linja, e njohur ndryshe si “Hekurudha e Vdekjes”, shtrihej rreth 413 kilometra dhe u bë e njohur edhe përmes filmit “Ura mbi lumin Kwai” të vitit 1957. Ajo mori këtë emër për shkak të mijëra viktimave që humbën jetën gjatë ndërtimit. Hekurudha u ndërtua mes tetorit 1942 dhe tetorit 1943 nga rreth 60 mijë robër lufte aleatë, kryesisht nga Britania e Madhe, Shtetet e Bashkuara dhe Kanadaja, si dhe nga qindra mijëra punëtorë aziatikë të detyruar të punonin në kushte ekstreme.
Fotografitë e publikuara nga mediat tajlandeze tregojnë segmente të shinave origjinale dhe mbetje të strukturave funksionale dhe të mirëmbajtjes së rrjetit hekurudhor. Ekspertët e konsiderojnë zbulimin një mundësi të rrallë për të studiuar pjesë autentike të linjës origjinale, pasi shumë prej stacioneve të tjera janë shkatërruar ose rindërtuar me kalimin e viteve.
Studiuesi australian Martyn Fryer, gjyshi i të cilit humbi jetën gjatë ndërtimit të hekurudhës në vitin 1942, tha se kishte tentuar disa herë të vizitonte stacionin Nithe, por niveli i lartë i ujit nuk e kishte lejuar më parë të shihte strukturat historike. Sipas ekspertëve, niveli i ujit këtë vit ka rënë në pikën më të ulët të dekadave të fundit, duke bërë që rrënojat të shfaqen më qartë se kurrë më parë.
Fenomeni ka tërhequr vëmendjen e historianëve, studiuesve dhe turistëve nga e gjithë bota, dhe ka kthyer zonën në një destinacion për ata që duan të studiojnë apo të vizitojnë pjesë të një nga kapitujve më tragjikë të historisë së Azisë Juglindore.
