Rreth orës 12:50 të mesditës së sotme një vatër e madhe zjarri përfshiu masivin me shkurre, ferra dhe bimësi të egër përgjatë zonës së lumit Shkumbin. Flakët u përhapën shpejt në një sipërfaqe të konsiderueshme, duke krijuar shtëllunga të mëdha tymi të dukshme nga distanca. Si pasojë e djegies së bimësisë dhe mbetjeve të ndryshme u formuan re të dendura tymi që mbuluan një pjesë të territorit përreth. Banorët raportojnë përhapjen e tymit në disa lagje të qytetit dhe shqetësime për cilësinë e ajrit dhe ndikimin në shëndetin e qytetarëve, veçanërisht të fëmijëve, të moshuarve dhe personave me probleme respiratore.
Përveç ndotjes vizuale, nga zjarri u përhap edhe një erë e rëndë dhe mbytëse që, sipas banorëve, ndjehet në pjesë të shumta të qytetit të Elbasanit. Situata riktheu shqetësimet mbi ndotjen mjedisore në këtë zonë, e cila prej vitesh konsiderohet problematike për ndikimin në mjedis. Ngjarja e sotme ndodhi vetëm një ditë pas një episodi tjetër të rëndë ndotjeje: pasditen e djeshme një zjarr masiv që preku një biznes në territorin e ish-Kombinatit Metalurgjik të Elbasanit krijoi për orë të tëra re të mëdha tymi, duke ndotur ndjeshëm ajrin në periferi të qytetit dhe duke shkaktuar alarm te banorët.
Dy zjarre brenda një harku kohor më pak se 24 orësh shtuan shqetësimet për gjendjen e mjedisit dhe nivelin e ndotjes atmosferike në Elbasan. Banorët kërkojnë ndërhyrje të shpejtë të institucioneve përgjegjëse për identifikimin e shkaqeve të zjarreve, për monitorimin e cilësisë së ajrit dhe për marrjen e masave parandaluese kundër ngjarjeve të ngjashme në të ardhmen. Autoritetet dhe shërbimet zjarrfikëse janë sinjalizuar dhe bëjnë përpjekje për izolimin dhe shuarjen e flakëve, me qëllim shmangien e përhapjes së mëtejshme të zjarrit dhe minimizimin e pasojave mjedisore. Banorët e zonës së Bradasheshit dhe të lagjes Skënderbej shprehin shpresën për normalizimin sa më të shpejtë të kushteve të ajrit dhe për eliminimin e rrezikut që paraqet tymi i dendur.
