Kryetari i Partisë Mundësia, Agron Shehaj, reagoi pas vendimit të Sekretariatit të Etikës që e përjashtoi për 30 ditë nga seancat plenare në Kuvend. Në një video të publikuar në rrjetet sociale, Shehaj tha se ky vendim përjashtimi nuk do t’i “mbyllë dot gojën” për të ushtruar opozitën dhe për të ngritur zërin për çështjet që shqetësojnë qytetarët shqiptarë.
Ai kritikoi drejtpërdrejt anëtarët e Sekretariatit, duke thënë: “Ulsiu dhe Taulanti sapo vendosën që unë nuk mund të flas në Parlament në 30 ditët e ardhshme.” Në të njëjtën deklaratë, Shehaj akuzoi se ata që qeverisin kanë dëmtuar jetën e qytetarëve gjatë dekadave të fundit: “Iu kanë nxirë jetën në këto 35 vite qytetarëve shqiptarë duke ua bërë jetën të pamundur.”
Shehaj përsëriti vendosmërinë e tij për të mos u heshtur dhe për të vijuar me aktivitetin opozitar pavarësisht masës disiplinore. “Nuk kam për ta mbyullur gojën! Nuk më ndalojnë dot! Do vazhdoj të bëj opozitë në Parlament, në bulevard me qytetarët dhe kudo që të më jepet mundësia,” deklaroi ai, duke nënvizuar angazhimin e tij për fushata dhe veprim publik jashtë dhe brenda sallës së Kuvendit.
Në fjalimin e tij, Shehaj akuzoi kundërshtarët politikë për korrupsion dhe kërkoi largimin e tyre nga skena politike. “Janë të korruptuar dhe duhet të largohen sa më shpejt. Edi Rama duhet të japë dorëheqjen,” tha ai, duke kërkuar dorëheqjen e kryeministrit.
Reagimi i Shehajt erdhi menjëherë pas shpalljes së masës disiplinore nga Sekretariati i Etikës, ndërsa ai përdori platformën e rrjeteve sociale për të dhënë qëndrimin e tij publik dhe për të thënë se do të vijojë aktivitetin opozitar pavarësisht pengesave institucionale.
