Drejtoria Vendore e Policisë Vlorë, në bashkëpunim me Drejtorinë e Forcës së Posaçme Operacionale në Policinë e Shtetit, finalizoi operacionin e koduar “Metodat” për kapjen e një personi të shumëkërkuar dhe me rrezikshmëri të lartë shoqërore. Në kuadër të punës intensive hetimore dhe operative, bazuar në informacionet e siguruara dhe në përdorimin e metodave speciale të hetimit, u lokalizua dhe u kap në një lokal në Borsh shtetasi Moisi Habilaj, 48 vjeç, banues në Babicë e Vogël, Vlorë. Arrestimi u krye provizorisht me qëllim ekstradimin drejt Italisë.
Habilaj është dënuar nga Gjykata e Katanias, Itali, me 12 vjet, 2 muaj e 13 ditë burgim për veprën penale “Pjesëmarrje në organizatë kriminale të armatosur me qëllim trafikimin e lëndëve narkotike”. Ndërkohë, ndaj tij u ekzekutua masa e sigurisë “Arrest në burg”, e caktuar me vendimin nr. 192, datë 26.12.2018, të Gjykatës së Krimeve të Rënda, për veprat penale “Prodhimi dhe shitja e narkotikëve”, “Trafikimi i lëndëve narkotike” në bashkëpunim në formën e grupit të strukturuar kriminal, si dhe “Grupi i strukturuar kriminal”.
Gjatë operacionit u arrestua në flagrancë edhe shtetasi E.A., 46 vjeç, banues në Sarandë. Po ashtu u procedua në gjendje të lirë shtetasi italian S.F., 70 vjeç, për veprën penale “Përkrahja e autorit të krimit”. Materialet procedurale lidhur me këto ngjarje i janë referuar Prokurorisë për veprime të mëtejshme.
