Autoritetet dhe organizatat mjedisore në Greqinë e veriut kanë alarmuar pas vrasjes së tre arinjve brenda pak ditësh, duke e konsideruar situatën goditje ndaj faunës së egër të mbrojtur. Rasti më i rëndë u regjistrua në prefekturën e Follorinës, pranë autostradës Egnatia, ku u gjet i plagosur rëndë një ari mashkull rreth 8 vjeç e me peshë 170 kilogram. Sipas ekspertëve, kafsha kishte hyrë në një arë me misër për të kërkuar ushqim dhe u qëllua me armë zjarri; me plagë në qafë dhe shpinë, ariu lëvizi vetëm disa metra para se të vdiste.
Pak orë më vonë, në një zonë pyjore të së njëjtës prefekturë, u gjet e pajetë një arushë dyvjeçare. Dyshimet e para tregojnë se ajo mund të ketë ngordhur pas konsumimit të ushqimit të helmuar; përgjigjen përfundimtare pritet ta japin analizat toksikologjike. Në zonën Voio të Kozanit, u gjet i vrarë me tre plumba në kokë edhe një ari i ri, rreth 2.5 vjeç. Autoritetet pyjore dhe policia kanë nisur hetimet për identifikimin e autorëve në të tre rastet.
Organizatat mjedisore rikujtojnë se ariu i murrmë është specie e mbrojtur në Greqi dhe vrasja e tij përbën vepër penale; ato kërkojnë forcimin e kontrolleve kundër gjuetisë së paligjshme dhe përdorimit të helmeve në natyrë. Autoritetet dhe ekspertët theksojnë gjithashtu se, vitet e fundit, kafshët e egra po afrohen gjithnjë e më shumë pranë zonave të banuara në kërkim të ushqimit, duke u bërë herë pas here rrezik për banorët. Jo vetëm arinjtë, por edhe ujqërit dhe derrat e egër janë parë shpesh në periferi të qyteteve dhe fshatrave të Greqisë veriore.
Raste të ngjashme janë regjistruar në Kostur, Follorinë, Kozan, Grevena dhe pranë Selanikut, ku tufat e derrave të egër janë shfaqur në rrugë dhe zona urbane. Kjo prani e shtuar shfaq, sipas burimeve të përcaktuara, ndryshimet në habitatin natyror dhe mungesën e burimeve ushqimore në pyje. Autoritetet dhe organizatat mjedisore i cilësojnë vrasjet si barbarizëm dhe vepër penale, duke kërkuar zgjidhje përmes programeve qeveritare të përcaktuara nga ekspertët e fushës.
