Presidenti amerikan Donald Trump shfaqi përsëri optimizëm për firmosjen e një marrëveshjeje, por shoqëroi deklaratat me kërcënime dhe një seri sulmesh gjatë natës nga forcat amerikane kundër objektivave ushtarakë të Iranit. “Nëse Irani nuk firmos marrëveshjen, do ta bombardojmë pa mëshirë”, tha ai, ndërsa televizioni Fox News raportoi që Trump paralajmëroi se forcat amerikane do të godisnin Iranin “me forcë”, duke akuzuar Teheranin për vonesë të tepërt në arritjen e një marrëveshjeje për përfundimin e përhershëm të luftës.
Komanda Qendrore e SHBA-së (CENTCOM) përshkroi veprimet ushtarake si “veprime vetëmbrojtëse”, të drejtuara kundër objektivave ushtarake, sistemeve të mbikëqyrjes dhe radarëve në jug të Iranit. Sipas raportimeve mediatike amerikane, Trump la të kuptohej se bombardimet mund të ndaleshin nëse Teherani pranonte një marrëveshje për t’i dhënë fund konfliktit; në të kundërt, ai paralajmëroi se SHBA do të vazhdonte operacionet ushtarake deri në “shkatërrim të plotë”.
Në reagim ndaj sulmeve amerikane, ushtria iraniane deklaroi se kishte bllokuar plotësisht Ngushticën e Hormuzit dhe kishte nisur kundërsulme ndaj objektivave në Bahrein dhe Kuvajt. Në një deklaratë të transmetuar nga mediat shtetërore, autoritetet ushtarake iraniane paralajmëruan se çdo anije që do të përpiqej të kalonte nëpër këtë korridor strategjik detar do të konsiderohej objektiv ushtarak. Sipas raportimeve iraniane, dy anije janë goditur gjatë incidenteve në zonë.
SHBA e kundërshtoi menjëherë pretendimin iranian. Në një postim në platformën X, CENTCOM deklaroi se trafiku detar tregtar po vazhdonte normalisht dhe se anijet po hynin e po dilnin nga Ngushtica e Hormuzit pa pengesa. Pra, ndërsa Teherani raportonte bllokim dhe goditje anijesh, autoritetet amerikane pohuan se lëvizja detare komerciale nuk ishte ndalur.
Raporti u transmetua nga Top Channel.
