Bordi i Transparencës ndryshoi çmimet e naftës dhe benzinës në mbledhjen e datës 10 Qershor 2026. Çmimi i shitjes me pakicë i nënproduktit gazoil, standard SSH EN 590, u vendos jo më shumë se 188 lekë/litër (nga 190 lekë më parë), ndërsa çmimi i shitjes me shumicë u vendos 176 lekë/litër. Për nënproduktin benzinë, standard SSH EN, çmimi i shitjes me pakicë u vendos 171 lekë/litër (nga 173 lekë më parë), kurse çmimi i shitjes me shumicë u vendos 159 lekë/litër.
Bordi njoftoi se çmimet e caktuara hyjnë në fuqi më datë 10 Qershor 2026, ora 14:00, dhe do të jenë të vlefshme deri në mbledhjen e ardhshme të bordit, ku do të pasqyrohen ndryshimet e çmimeve të shitjes. U tërhoq vëmendja për detyrimin e çdo operatori të shitjes me shumicë dhe pakicë të nënprodukteve të naftës për zbatimin e këtij vendimi. Në rast të shkeljeve të konstatuara nga operatorë të ndryshëm do të vendoset pezullimi i aktivitetit.
Ministria e Ekonomisë dhe Inovacionit, së bashku me Ministrinë e Financave dhe Ministrinë e Infrastrukturës dhe Energjisë, deklarohen të angazhuara për të mbrojtur interesat e konsumatorëve shqiptarë dhe ruajtjen e parimeve të konkurrencës së ndershme në treg.
Sqarim lidhur me Aktin Normativ nr. 1, datë 3.4.2026: në rast se çmimi i shitjes me pakicë për gazoili tejkalon 220 lekë/litër, ose për benzinën tejkalon 200 lekë/litër, zbatohet niveli 80% i akcizës. Bazuar në metodologjinë për llogaritjen e çmimeve tavan të shitjes me pakicë, çmimet aktuale janë nën kufirin e parashikuar në aktin normativ, dhe për rrjedhojë niveli i akcizës do të zbatohet i plotë, 100%.
Përsa i përket gazolit për peshkim, referuar Ligjit 9975, datë 28.07.2008 dhe Ligjit 61/2012 “Për akcizat”, parashikohen përjashtime nga taksat dhe akciza për anijet e peshkimit sipas kushteve të VKM. Referuar metodologjisë së përcaktuar në aktin normativ, çmimi i shitjes së gazolit për peshkim rezulton 92 lekë/litër.
