Mikel Arteta u përpoq të fshehë zhgënjimin pas humbjes së Arsenalit në finalen e Ligës së Kampioneve, një finale që Topçinjtë e pritën prej 20 vitesh. Trajneri spanjoll, pas ndeshjes, bëri një analizë të asaj që u pa në fushë ndaj Paris Saint Germain dhe u shpreh për ndjenjat e tij ndaj ekipit dhe sezonit që bënë.
“Besoj se duhet t’i dominosh emocionet. Ndjen dhimbje por duhet ta provosh. Sporti kështu është,” tha Arteta, duke shtuar se kjo nuk e fshin krenarinë që ndjen për futbollistët e tij, për sezonin dhe për momentet që u dhanë ditë pas dite. Ai e përshkroi grupin si “një grup i mrekullueshëm” dhe shprehu bindjen se atë që përjetuan këtë sezon do ta përjetojnë përsëri “në një mënyrë tjetër”. Arteta theksoi se skuadra është e vetëdijshme për atë që ka bërë, por theksoi se kur je kaq pranë një skuadre si PSG duhet ta pranosh se ata kanë burime për çdo gjë; ndjeu keqardhje sepse Arsenal kishte mundësinë të realizonte diçka që nuk është arritur kurrë në historinë e klubit.
Për planin e ndeshjes, Arteta tha: “Po, e kishim në plan të shënonim kaq shpejt, por nuk donim të qëndronim poshtë në bllok për shumë kohë.” Ai vuri në dukje se PSG është një ekip që gjen zgjidhje, sidomos në aspektin individual, dhe i atribuoi meritë punës së trajnerit Luis Enrique. “Ishim shumë pranë PSG, por nuk kishim atë dozën e fatit,” tha ai.
Penalltitë ishin ato që ndëshkuan Arsenalin, dhe u përmendën konkretisht gabimet e Eze dhe Gabriel. Arteta theksoi se ekzekutuesit ishin ata që mund të ishin dhe se i mungonin ekspertë si Havertz, Saka dhe Odegaard. “Ishim përgatitur,” shtoi trajneri, duke thënë se e dinin se penalltitë do të ekzekutoheshin nga lojtarë të ndryshëm nga ata që ishin në fushë në fillim të ndeshjes; u deshte saktësi, por nuk e patën.
Në fund, kur u pyet për të ardhmen e tij, Arteta shmangu një përgjigje të drejtpërdrejtë: “Kam nevojë të pushoj sepse ka qenë një vit shumë i gjatë,” duke falenderuar futbollistët, stafin dhe tifozët për përkushtimin gjatë 10 muajve të fundit.
